2020 чылда «Демография» национал төлевилел күүселдези-биле Тывага 3 уруглар садын тудар

1,5 хардан 3 харга чедир 1769 уруглар хүлээп алыр уруглар садтары ажыттына бээрге, садик дээш оочур элээн кызырлыр. А Шагаан-Арыг хоорайда туттунуп турар 280 олуттуг чаа уруглар сады бөгүнде оочурда 202 уругну хүлээп алырга, оочур чок апаар. Бо уруглар садтары-биле чергелештир, Тээли биле Ийи-Тал суурларда уруглар садтарынга немей 30-30 олуттуг ясли корпустары туттунуп турар. 

Тываның Чазаанга “Демография” национал төлевилелдиң күүселдезин сайгарып турда, ол медээлерни дыңнаткан. Республика национал төлевилелдиң шупту беш угланыышкынында киржип турар. Ол дээрге, “Өг-бүлеге чаш төл төрүттүнгенде саң-хөө деткимчези”, “Үш хар чедир чаштарны назы четпээн өөредилге черлеринге тургузары – ие херээженнерни ажылга хаара тударынга деткимче”, “Узун назын”, “Чоннуң кадыын быжыглаары”, “Спорт – амыдыралдың нормазы” деп программалар болур. 

Ол төлевилелди боттандыргаш, республикада чоннуң назы-харын 78 хар, а кадык амыдыралдың үргүлчүлелин 67 хар чедирер планныг. А өзүп-көвүдээриниң каттышкан хуузу 1,7 чедир улгадыр ужурлуг. Кадык амыдыралды эдерип, күш-культура болгаш спорт-биле доктаамал белеткелде кижилер 55 хуу чедир көвүдээри көрдүнген. 

Тывада 12943 өг-бүле дун төлү төрүттүнгени-биле (азырап алганы) холбаштыр ай санының төлевирлерин ап турар. Ол сорулгада шупту 666,9 млн. рубль көрдүнген. Оон аңгыда, үшкү база оон дараазында чаштары төрүттүнгенде, үш харга чедир ай санының акша төлевирлери төлеттинер. Республикада 1208 ада-ие ону ап турар. Чыл эгезинден тура 829 кижиге пособиени төлээн. 

Регионнуң ие капиталын 225 кижи алыр. 2020 чылда ооң хемчээли 55,620 муң рубль, 2019 чылга деңнээрге 3% хөй (54,0 муң рубль). Отчеттуг үе дургузунда 74 кижи регионнуң ие капиталын алган.