Тываның Баштыңы Өөредилге яамызындан сентябрь 1-ниң чыскаалын канчаар эрттирерин тодарадырын негээн

«Уругларның школаже киреринге чедир ийи неделядан эвээш үе арткан. Билиглер хүнү чаа хевирге эртер ужурлуг деп шупту билип турар бис. Ажы-төлдүң айыыл чок чоруун хандырары – сагыыр чүүл ол” – деп, Тываның Баштыңы сагындырган. 

Школачыларның чыскаалын эрттирериниң чиге чурумун дарый ажылдап кылыр даалганы сайытка ол берген. Ада-иелер-биле канчаар эрттирип болурунуң: чүгле биргиклассчыларга болгаш доозукчуларга чыскаалды эрттирер ийикпе, азы класстарны чергелештир чыскаалдырар бе дээш, арга-хевирлерни сүмележир херек деп, ол бодалын илереткен. Санитарлыг хандырылга, ада-иелерге аңгы булуң дээш, шупту аргаларны көөрүн ол чагаан.

 «Школаже уругларны белеткээр чаңчыл болган сагыш човаашкынывыс – эң кол чүүл ол. Хөй ажы-төлдүг, амыдыралдың берге байдалынга таварышкан өг-бүлелерге дузалажып, школаже шупту уругларны төлептиг белеткежир. Ниитилелдиң бүгү-ле хевирлери ачы-дуза акцияларынга үлүүн киириштирер. Дузага хереглелдиг кижилерге холду сунуп, дузаны көргүзээлиңер” – деп, ол демдеглээн. 

Тываның Баштыңы Шолбан Кара-оол чаа өөредилге чылында өөреникчилерни өөредилге номнары-биле 100 хуу хандырар даалганы өөредилге яамызының мурнунга салган.