«Интергео» компанияның удуртукчузу Лев Кузнецов Республика Хүнү-биле Тываның Баштыңынга байырны чедирген

«Интергео» БК” КХН компанияның чиңгине директору Лев Кузнецов кол национал байырлал – Республика Хүнү-биле Шолбан Кара-оолга болгаш Тываның чурттакчыларынга байырны чедирген. 

Россияның улуг даг-тывыш компаниязының удуртукчузу Тываның чурттакчыларынга чаагай чорукту, чечектелиишкинни, бүгү-ле эгелээшкиннеринге чедиишкиннерни күзээн байырлыг телеграмманы чоруткан.

Сөөлгү чылдарда Тываның удуртулгазының чоруткан политиказының ачызында, регион бодунуң экономиктиг курлавырын делгемчидип, канчаар-даа аажок улуг төлевилелдерни боттандырып, кадрлар белеткелиниң деңнелин бедиткен. 

«Интергео» БК” КХН компания Красноярск край биле Тыва Республиканың девискээрлеринде улуг хемчээлдиг төлевилелди боттандырып турар. Төлевилел делегей чергелиг ийи даг-болбаазырадылга комбинадын дөзевилеп, ону тудар. Тываның хөгжүлде-сайзыралынга төлевилел боттаныышкыны улуг үлүүн киирип, моон-даа соңгаар үре-түңнелдиг кады ажылдажылгага идегеп турарын Лев Кузнецов дамчыткан.