Тываның Баштыңы найысылалче кирер орукка тургузар скульптураларның дөзевилелдерин сонуургап көрген

 Республиканың чурукчулары, эртемденнери, артистери болгаш өске-даа чогаадыкчы ажылдакчылары кирген 23 кижи составтыг конкурс комиссиязы найысылалче кирер черге тургузар кылдыр бир скульптураны шилиир. 

 Мөөрей 3 чадага эртер. Август 5-те эртер бирги чадада - 5, а ийигизинде - 3 ажылды шилип алыр. Сентябрьда тиилекчиниң ажылы илереттинер. 10 киржикчи мөөрейже 20 ажылды киирген.  

Тываның Баштыңы Шолбан Кара-оол Кызылдың мэри Карим Сагаан-оолдуң ажылдаар өрээлинде төлевилелдерниң эскизтерин сонуурган. Авторлар Тываның ниити овур-хевирин боттарыныы-биле көргүскенин ол чугаалаан. Оларның аразында «Ава Тыва» темага ийи ажыл бар. 

Май-оол Монгуш аът хевиринге сарыг шажынның ыдыын көргүскен. Тываның каш чүзүн малын, кадак, алаң-тос чечээн көргүскен элээн ажылдар бар.

 Александр Баранмааның тыва хөөмей, хүреш, аът чарыжы база өг көргүскен «Хүндүлээчел Тыва» ажыл кичээнгейни хаара туткан. 

Ол ышкаш «Чурттуң ээзи» деп ажыл сонуургалды болдурган. Холунда хураган туткан тыва кадарчының хүндүткелди илереткени. Улуг-Хемден суг ишкен аът. Александр Ойдуптуң скульптуразында - тоолчургу арзылаң-ыт. Оглу-биле кады кылганы “Хөөмей” деп ажылында аалчыларны уткаан аныяк хөөмейжини көргүскен. 

Тывада даглар хөйүн бут адаанда даш илереткен. Холдуң уундан, ырак эвесте ооң аъды бары, илдең. Бурунгаар херии базымны ооң бичии-ле көдүрүп алган буду көргүзүп турар. 

Эрес-оол Байындының «Ава» деп ажылында аяк сунган чоргаар тыва херээжен кижи бар. Чонар-даштан теве сиилбээн ажылды база көрүп болур. 

Конкурс комиссиязы бо бүгү ажылдарны сайгарып көөр, хөйнүң үнүн алган чаңгыс скульптура Кызыл хоорайны каастаар.