Тываның Экономики яамызы “Кеш” губернатор төлевилелин 2019 чылда чедиишкинниг боттандырган киржикчилерни онзалап демдеглээн.

Оларга Тыва Республиканың социал-экономиктиг хөгжүлдезинге киирген ачы-хавыяазы болгаш ак сеткилдиг күш-ажылы дээш яамының хүндүлел бижиктерин тывыскан. 

Бии-Хем кожууннуң Турандан эки үре-түңнелдери-биле сурагжаан киржикчи Донгак Чайнаа Марышовнаны массалыг информация чепчектеринге чаңгыс эвес катап чырыткан. Ол 2019 чылда “Алдын чөөк” деп эттээн кештен национал болгаш хүн бүрүде кедер хептер база эдилелдер бүдүрер республика мөөрейиниң даараныр шеверлер аразынга “Алгы эттээр талазы-биле тулган мини-комплекс” деп шаңналынга төлептиг болган. 

Ыраккы Тожу кожууннуң Адыр-Кежиг суурнуң чурттакчызы Владимир Чынзааович Ооржак төлевилелди дээштиг боттандырган киржикчилерниң бирээзи. Эттээн кештерден унтыларны боду даарап эгелээни – сайгарлыкчының кол чедиишкини. Төлевилелди боттандырар дээш, Тываның сайгарлыкчы чорукту деткиир фондузундан чиигелделиг чээлини база “Тожу кожууннуң чурттакчы чонну ажылга хаара тудар төвүнден” акша-хөреңгини алгаш, 310 муң рубль акшага алгы-кеш эттээр, хоюглаар, идик даараар станоктарны садып алган. 

Сайгарлыкчы чорук фондузунуң кластерлиг хөгжүлде төвү таварыштыр чиг-эт болбаазырадыр техноголияның өөредилгезин эрттип алырга, кожууннуң чагыргазы эрги оран-саваны берип, септелгезин кылып, сайгарлыкчызын деткээн. 2019 чылдың октябрь 11-де, Азас сумузунуң үндезилеттингенинден бээр 70 чылын демдеглээн байырлал үезинде, Ооржак В.Ч-ниң ХБ “Тыва кадыг идик база кышкы унты бүдүрер цехти” албан езузу-биле ажыткан.

2019 чылда сайгарлыкчы “Алдын чөөк” республика мөөрейинге киришкен. Тываның Сайгарлыкчы чорукту деткиир фондузу продукцияның чогуур негелделерге дүгжүп турарынга сертификатты алырынга дузалашкан. 

Чоннуң чагыы-биле национал хептерни даарап-септээр ачы-дузаны ол көргүзүп турар. Владимир Ооржак 2019 чылдан бээр ажылдап эгелээш, 5 тыва тоннарны база иви бышкаандан 17 унтыларны даарап, үш чүс муң ажыг акша орулгазын ажылдап алган. Бир эжеш унтының өртээ 17 муң рубль болза, тыва-тоннуң – 5 муң рубль.