Тывада «Аныяк өг-бүлеге кыштаг» губернатор төлевилелиниң бешки ээлчээниң киржикчилеринге малды дамчыдар кылдыр белеткээн

Төлевилелди ийи чыл бурунгаар эгелээн киржикчилерниң ажыл-агыйларындан малдарны шилээн. Керээ негелдези езугаар, эрткен үе дургузунда олар күрүнеден алган малының бажын көвүдедир өстүрген болгаш, “кыштагжыларның” дараазында киржикчилерин мал бажы-биле хандырарлар.  

ТР-ниң Көдээ ажыл-агый яамының болгаш кожууннарда эргелелдерниң специалистери дамчыдар малдарны шинчип, ветеринар-профилактиктиг хемчеглерни чорудуп, онза айыылдыг аарыгларга удур тарылгаларны кылганын дыңнаткан. Ниитизи-биле 20200 баш хойларны база 80 баш инектерни шинчээш, тараан.  

«Аныяк өг-бүлеге кыштаг» төлевилелдиң киржикчилеринге малды июнь айда дамчыдары планнаттынган. Малдарның чогуур документилерин амгы үеде белеткеп турар.  

«Июньда “Аныяк өг-бүлеге кыштаг” төлевилелдиң ээлчеглиг бешки чадазы шимчеп эгелээр. Төлевилел шынап-ла чончу апарган. Кижилер бодунуң ижин эгелеп, келир үеде өг-бүлезиниң чедимчелиг чуртталгазын хандырарынга онза арганы бээр дээрзинге база катап бүзүрээр мен. Бо чылын төлевилелге 105 өг-бүле каттыжар болгаш, ажыл-агыйларның ниити саны ам 500 ажа бээр. Ажыл-агый бүрүзүнге салыр эге негелделерни эң кичээнгейлиг өөренип көөрүн даастым. Деңгели эки малдарны дамчыдып, одар-белчиирлиг, суг-биле хандырылгазы чогумчалыг, автотранспорт-биле хала чок чеде бээр, электри четкилеринге кожары чоок чер участоктарын фермаларга бээр херек. «Кыштагны» ачы-буян төлевилели кылдыр көөрүнден үнер херек. Бөгүнде ол мөөң күш апарган, оларны долгандыр зоотехниктиг, ветеринарлыг, садып-саарылгалыг дээш оон-даа өске инфраструктураны тургузуп болур. Ынчап кээрге, удавас “Кыштаг” мал ажыл-агыйының кол өзээ болгаш тепкиижи апаар” – деп, Тываның Баштыңы Шолбан Кара-оол төлевилелдиң хөгжүлдеже чаа чадазын тайылбырлаан.