Тываның Кадык камгалал яамызы апрель ай дээш эмчилерге деткимче төлевирлерни бүрүнү-биле төлээн

Россия Федерациязының Чазааның № 415 база № 484 доктаалдарынга даянгаш, төлевирлерни санаан. № 415 доктаалда көрдүнген немелде төлевирлерни чаа коронавирус аарыы илереттинген хамаатыларга дуза чедирип турар база халдадып ап болур айыылдыг бөлүкке хамаржыр эмчи ажылдакчылары алыр. Ол доктаал-биле 945 эмчи ажылдакчылары («дүрген дуза» чолаачылары, бирги звено база стационарлардан аңгыда) апрельдиң деткимче төлевирлерин алган. 

Россияның Президентизи В.В Путин деткимче төлевирлер алыр эмчи ажылдакчыларының санынче “дүрген дуза” чолаачыларын база киирген. 

РФ-тиң Чазааның № 484 доктаалы-биле, covud аарыы бадыткаттынган аарыг кижилерге чогуур дузаны чедирип турар халдавырлыг аарыглар эмнелгезиниң, “Дүрген дузаның” тускайлаттынган бригадаларынга, чолаачыларынга база төлевирлерни доктааткан. 146 эмчи ажылдакчылары ол доктаалга үндезилээн идиг бээр немелде төлевирлерни алган. 

№ 484 доктаалда көрдүнгени езугаар, дүрген эмчи дузазының чолаачыларынга деткимче төлевирниң хемчээли 47,5 муң рубль болур. Тывада республиканың дүрген эмчи дузазының база медицина катастрофаларының төвүнүң 18 чолаачызы апрель айның шалың акшазынга немей ол хире түңнү алганнар. 

Чаа коронавирус аарыынга удур демиселдиң амгы үезинде өске эмнелге организацияларындан чыгган 86 чолаачы ол төпте ажылдап турар болгаш, график езугаар сменазынче кирерлер. 

Регионда аарыгның көвүдээни база эпидемиологтуг байдалдың нарыыдааны-биле холбаштыр тускайжыттынган бригадаларда ажылдаан шупту чолаачылар деткимче төлевирлерни май айда алырлар.

Ажылдакчыларның кол шалыңы хевээр артар. Бо болза шалыңга немелде төлевирлер болур. Апрель, май, июнь айларда эмчи ажылдакчыларының ажылының онза байдалы база немелде чъүгү дээш идиг бээр деткимче төлевирлер тургустунганын сагындыраал.