Тываның Саң-хөө яамызы коронавирус-биле дорт демиселде эмчи ажылдакчыларынга тургускан деткимчени төлээриниң чурумун тайылбырлаан

Тыва Республиканың саң-хөө сайыды Орлан Достай, журналистер-биле брифингиде, Россия Федерациязының Чазаа ол акша-хөреңгини бээриниң негелделерин болгаш чурумун ийи документиде тодаратканын демдеглээн. 

Бирги документ – РФ-тиң Чазааның 2020 чылдың апрель 2-де №415 доктаалында коронавирус инфекциялыг хамаатыларга база контактылыг кижилерге онза чугула ажылдарны кылып турары дээш эмчи болгаш өске-даа ажылдакчыларга деткимче төлевирлерин тургускан. Республиканың Кадык камгалал яамызы деткимче төлевирлерин алыр эмнелге организацияларының даңзызын тодарадып турарын Орлан Достай чугаалаан. Ол даңзыны бадылаан соонда, эмнелге организациязының удуртукчузу структурлуг кезекти, албан-дужаалдарны, төлевирниң хемчээлин база хуусаазын тургузар.

Регионда деткимче төлевири эрткен чылдың тос айларында ортумак орулгадан алгаш хуулааны-биле - республикада 32890 рубль болур деп саң-хөө сайыды чугаалаан. Чижээ, стационарда тускай эмчи дузазын чедирип турар эмчилер – айыттынган түңнү 100%, ортумак эмчи персоналы – 50%, биче эмчи персоналы – 30% алыр. Үнүп келген түңнү республикада тургускан районнуң соңгу чүк коэффицентизинге база индексаастаар.

 Ийиги нормативтиг-эрге-хоойлу актызы – РФ-тиң Чазааның 2020 чылдың апрель 12-де № 484 доктаалы-биле, коронавирус инфекциялыг аарыг кижилерге дорт ачы-дуза чедирип турар эмчи ажылдакчыларынга: Тыва Республиканың Кадык камгалал яамызының дужаалы-биле хевирлээн дүрген эмчи дузазының тускай бригадаларынга, ол ышкаш бадыткаттынган COVID-19 диагнозтуг хамаатыларга дуза көргүзүп турарларга деткимче төлевирлерни тодараткан. 

Россия Федерациязының Чазаа ол документ-биле төлевирлерни доктааткан. Дүрген эмчи дузазының эмчилеринге – 50 муң рубль, ортумак эмчи персоналынга – 25 муң рубль, биче эмчи персоналынга, ол ышкаш чолаачыларга – 25 муң рубль, стационар эмчилеринге - 80 муң рубль, стационарларда ортумак эмчи персоналынга – 50 муң рубль база стационарда биче эмчи персоналынга – 25 муң рубль. Ол түңнерни район болгаш соңгу чүк коэффицентилеринге индексаастаар. Чижээ, дүрген эмчи дузазының эмчизинге бир сменаже үнгени дээш 13 571 рубльди, долу 7 смена дээш – 95 муң рубльди санаар. 

Ийи төлевирни херек кырында ажылдаан үезинде кылган ажылын көрүп санаар. 

«Бөгүнге чедир апрель ай дээш бирги төлевирни чорударынга 15 млн. 935 муң рубльди шилчиткен. 651 кижи ону алыр. 3 млн. 540 муң рубль ниити түңнүг ийи төлевирни 121 алган. Кадык камгалал яамызы 1-ги төлевирге деткимчени санаар ажылды дооскан, апрель дээш 147 кижи ону алыр. Саң-хөө яамызы акша-хөреңгини немей шилчиткен, май 18-те эмчилерниң агар санынче кирип эгелээр» - деп, Орлан Достай тайылбырлаан.