Тываның арга-арыгларында регион чергелиг онза байдал чурумун соксаткан, ындыг болзажок өртке удур онза чурум хевээр арткан

2020 чылдың май 15-те 09.00 шактыы-биле алырга, Тыва Республиканың девискээринде 633 га ниити шөлдүг 3 арга-арыг өрттү хып турган, Тожу кожуунда 265 га черде өрттү өжүрген деп, өрттен арга-арыг камгалаар албан дыңнаткан. Өрттерни өжүреринге 145 кижи база 18 техника хаара туттунган, бүгү күштер четчир. Чурттакчылыг черлерге айыыл чок. 

Арга-арыгда өрттер байдалы чогумчааны-биле, Тыва Республиканың Чазааның 2020 чылдың май 8-те хүлээп алган 188 дугаарлыг доктаалын күш чок болдуруп, Тыва Республиканың девискээринде арга-арыгларда регион чергелиг онза байдал чурумун соксаткан. Ынчалза-даа өртке удур айыыл чок чорукту хандырары-биле өртке удур онза чурумну хевээр арттырып, 2020 чылдың май 28-ке чедир арга-арыгже кижилерниң болгаш транспорт аймааның кирерин хораан.