Кызыл хоорайның чөөн микрорайонунда көдээ ажыл-агый рыногунуң тудуу адакталган

Амгы үениң негелдези-биле туттунган, улуг соодукчуларлыг, хандырар персоналдыг, модульдуг рынок туттунган. Шак-ла ындыг объектини Кызылдың оң талакы микрорайонунда база тудуп турар. Ол ийи рыноктуң ачызында, республиканың шупту 18 кожууну боттарның бараан бүдүрүкчүлеринге найысылалга садыгланып-саарлыр точкаларны ажыдар. 

«Восточный» рынокту бо чылдың июньда ажыглалга киирер деп планнаан. Объектиниң дөзевилекчилери база тудугжулар курлавыр хандырар организациялардан хамаарышпас, боттары хандыртынар кылдыр ону кылган. Садыглажылганы таарыштырары-биле ону ынчаар планнаан. Азы болза, изиг, соок суг база чылыг дээш ачы-дузаның монополиялыг өртектери ам эъттиң өртээнге салдар чедирбес. 

«Ол рыноктарда садып турар барааннарга таарымчалыг өртектерни тургузар бис. Амдыызында ставка 10 – 15 % болур. Араттардан хүлээп алган эъдиниң өртээн 2-4 катап өстүрүп, чылдың кайы-даа үезинде ону өскертпейн садып турар коммерциялыг рыноктарга бистиң рыноктарывыс чижилгени тургузар – деп, Тываның Баштыңы Шолбан Кара-оол чугаалаан. - Кызылда Тываның кол садыг шөлүнде эът рыногун херек кырында чүгле чаңгыс кижи хевирлеп база контрольдап турары шын эвес. Мал ажыл-агыйлыг республикада, чылдың үезиниң аайы-биле, эътке өртектер өскерлип турар ужурлуг». 

Чаа рыноктар «Кыштаг» төлевилелдиң киржикчилеринге хөгжүп-сайзыраарының чадазы апаар деп, Тываның Баштыңы демдеглээн.