Тывада коронавирустан аараан кижилер чыттырар эмнелгениң медтехниказы чогуур чөпшээрел негелделеринге хыналданы эрткен

«Белеткеп алганывыс госпитальга бөгүн улуг комиссия ажылдап, албан езунуң төнчү түңнелин үндүрдүвүс. Чогуур негелделерге орун бүрүзү дүгжүп турарын хүлээп алдывыс. Чөпшээрел документилери алдынган» - деп, Тываның Баштыңы Шолбан Кара-оол дыңнаткан. 

Терапия корпузунда 229 орун бар, өске эмнелгелерде салган оруннар-биле кады шупту 327 инфекция оруннары белен, оларның 58-зи реанимация оруннары болур. 

«Эмчилеривиске дээш индивидуалдыг камгалал дериглерин немей садып ап тур бис. Ол чүүлдер эмчилерге турган, ынчалза-даа кандыг-даа байдалга белен болуп, немей садып алырын негеп тур мен» - деп, Тываның Баштыңы демдеглээн. 

ТР-ниң Ажыл-чорудулганың чамдык хевирлеринге чөпшээрел бээр база хынап хайгараар албанның кадык камгалал адырында лизенция бээр килдистиң начальниги Сайсана Хайбының удуртканы комиссия техникаларның канчаар ажылдап турарын хынаан. 

«Аарыг кижилерни эмнээринче хаара туттунар ажылдакчыларның барын, дериг-херекселдерниң негелделерге дүгжүп турарын көрдүвүс. Шупту дүгжүп турар-дыр. Лицензияны бердивис. Аппараттар шупту дээди эксперт деңнелдиң, сөөлгү үндүрүлгениң болуп турар. Шупту ажылдап турар болгаш, ажыглаарынга белен. Ажылдакчылар шупту ажылче шымны бергенин көрдүм. Ол чүгле терапия корпузунга ажылдаар эвес, а республиканың 1 дугаар эмнелгезиниң бүгү ажылдакчыларынга хамааржыр. COVID-19-ту шинчип илередиринге болгаш эмнээринге өөредилгелерни чорудуп турар. Терапия эмнелгезиниң баазазында республиканың өске эмнелге албан черлеринден ажылдакчыларга өөредилгелерни организастаан» - деп, Сайсана Хайбы чугаалаан. 

Хыналданы эрткен шупту медицина техниказында «Аппарат ажылдап турар» деп бижиктиг ногаан демдектерни салган. Дериг-херекселдерге чөпшээрел бижиктерни долдурган.