Бот-аңгыланыр чурум үезинде арага садарын хораан соонда, Тывада «эзирик» кем-херектер саны кызырылган

«Иштики херектер сайыды Юрий Сергеевич Поляковтан, бот-аңгыланыр ниити чурумну киирген үеде марттың 30-ден, арага аймаан садарын хорааны тодаргай үре-түңнелдерлиг болган деп, дыңнаары дыка өөрүнчүг болду. Шынап-ла «эзирик» херек үүлгедиглери эвээжээн. Ынчангаш полиция ол кызыгаарлаашкынны ам-даа узадырын дилээн. Марттың 30-ден апрель 5-ке чедир 29 кем-херек бүрүткеттинген, а марттың 23-тен 29-ка чедир 46 херек болган. 36,9 хуу эвээш. Апрель 5-те чаңгыс-даа кем-херек болбаан. Сайыттың чугаазы-биле алырга, эрткен неделяда көргүзүг ам-даа кызырылган. Тываның ИХЯ-зы-биле кады ажылдап кылган арга-хевирлеривис база хөделиишкиннеривис, полицияның талазындан арага чажыт садыгжыларынга удур моондакты тургузуп турар. Полицияның талазында болгаш, оларны деткиир мен. Муниципалдыг эрге-чагырга база ол турушту деткиир ужурлуг» - деп, Тываның Баштыңы Шолбан Кара-оол соцчеткилерде бодунуң дыңнадыында бижээн.