Тываның Баштыңы РФ-тиң экономиктиг хөгжүлде сайыды-биле ужурашкан

Программа биче болгаш ортумак бизнести деткивишаан, бүдүрүлге шөлдерин тудуп, чиигелделер чурумун киирип, туризмни сайзырадып, регионнуң экономиказын хөгжүдеринге үндезинни тургузар деп түңнээн. Россияның Экономиктиг хөгжүлде яамызы программаны кураторлаар. 

Регионнуң транспорт инфраструктуразын база энергия хандырылгазын хөгжүдер айтырыгны база аңгы чугаалашкан. Максим Решетников казымал байлактар чыдыны бар черлерни хөгжүдеринге тус черниң инвесторларының беленин база инвесторлар-биле кады ажылдаар арга-хевирлерни чедир ажылдаарын республика баштыңындан дилээн. 

«Россияның Чазак даргазынга Тываны хөгжүдериниң бот-тускайлаң программазын бадыладыр мурнунда, төнчү дугуржулга чөпшээрежилгелерни кылдым. РФ-тиң экономиктиг хөгжүлде сайыды М.Г. Решетников-биле “улуг сектерни” салдывыс. Максим Геннадьевич ужуражылга мурнунда, 2019 чылда программа талазы-биле кылган ажылдарывысты кичээнгейлиг өөренип көргенинге, таарзындым. Ынчангаш тайылбырлап олурбайн, ажыл-агыйжы чугааже дораан кирдивис. Инфраструктура, транспорт база энергетика төлевилелдеринден аңгыда. Программаның өзээ ол болганда, чаңгыс угже көрүп, чаңгыс шимчээшкин-биле ажылдаар ужурлуг бис. Сайыт ам кылыр ажылдарывыстың бир чугула онзагайын тодаргай билип алды – бизнес чиигелделерни берип, федералдыг бюджеттен миллиардтарны тускайлап турзажок, инвесторларның оочурлап чедип кээрин манаан ажыы чок. Ынчап кээрге, сайгарлыкчыларны мөөңнеп, боттуң күжүнге ынанганы дээре. Эге дээрезинде заводтар болгаш комбинаттар дээн ышкаш объектилерже шыгаап, тус черниң бизнезин көдүрүп, ол объектилерге кымнар ажылдаарын боданыр бис. Ындыг инвесторларны маңаа белеткеп эгелээрин, а РФ-тиң Экономиктиг хөгжүлде яамызы бүгү тала-биле дузалажырын дугуруштувус» - деп, Шолбан Кара-оол ужуражылга соонда соцчеткилерде бижээн.