Тываның Баштыңы: Россияның Конституциязынга дылдың хөй талалыын айтыр

Владимир Путин Россияның күрүне тургузуп турар чоннарның харылзажыр орус дылы күрүне дылы болур дээн эдилгени Күрүне Думазынче саналдап киирген. Президентиниң инициативазын Думаның күрүне тургузуу болгаш хоойлужудулга комитеди деткээн. 

Россияның шупту чоннарының болгаш этностарының культурлуг бот-тускайлаңын бүрүнү-биле камгалап, ылаңгыя үндезин биче буурай чоннарның эргелерин магадылаары, Конституцияның 69 чүүлүнүң чаа редакциязында көрдүнген деп, Песков демдеглээн. 

Тываның Баштыңы Шолбан Кара-оол Президентизиниң инициативазынга хамаарыштыр бодалын илереткен. Кандыг-даа чоннуң мандып хөгжүүрүнүң ханы дөзү - дылын кадагалап арттырып алырында деп ол санаан. 

«Бистиң Президентивис В.В. Путин чуртувустуң келир үеде салым-чолу дээш мерген угаанныг база харыысалгалыг болганын база катап шынзыттым. Конституция-биле орус дылды камгалаары кончуг шын. Россияның эвээш санныг чоннарының туруштуунуң ол кезээде быжыг чөлеңгиижи болуп чоруур. Россияның күчүзү - ооң культуразының хөй талалыында - деп, Тываның Баштыңы Шолбан Кара-оол социал четкиде бижээн. - Күрүне Думазынче Владимир Владимировичиниң кииргени РФ-тиң Конституциязынче эдилгези, национал республикаларга бодунуң дылын күрүне дылы кылдыр доктаадып, ужур-чаңчылдарывысты болгаш төөгүвүстү быжыглап алыр эргени берип турар. Россияның Конституциязынга дылдың ындыг хөй янзылыы бижиттинген турар ужурлуг».