Шагаа-2020 чоннуң байырлал хүннеринде делгелге-садыглаашкынның түңнелдери

Тыва Республиканың Экономика яамызы биле Кызыл хоорай мэриязы Кызылдың Арат шөлүнге, 2020 чылдың февраль 24-те, делгелге-садыглаашкынны база хөй-ниитиниң чемнелгезин организастаан. Биче болгаш ортумак сайгарлыкчы чоруктуң 56 субъектизи аңаа киришкен. Ол хүн делгелге-садыглаашкынның киржикчилери 104,5 муң рубльди ажылдап алган. 

“Чаңгыс суур – чаңгыс бүдүрүлге” төлевилелдиң киржикчизи, М.М. Кырлыг-Караның удуртканы тараачын-арат ажыл-агыйының ярмаркага саткан эттеп каан хоюнуң кештери дораан саттына берген. Тус чер бараан бүдүрүкчүзү, “Тыва чемнер бүдүрер төп” КХН-ниң «Тыва мороженое» деп ылгавыр демдектиг чемнери - тыва шоколады, курут, быштак, ааржы, сүдүнге хереглел улуг болган. Хуу сайгарлыкчы Шарый-оол К.О. тыва хептерни база бөртерни делгеп, саткан. 

Сүт продукциязы, хлеб-булочка база кондитер кылыглары, чартык фабрикаттар, варенье, мед, аргып, даараан чүүлдер, аржыылдар, национал аъш-чем, ус-дарган ажылдарның суй-белектери, шажынчы эдилелдер дээш, ярмаркада өске-даа чүүлдер найысылалдың чурттакчыларын база аалчыларны сонуургаткан. 

Садыглаашкынны хөй-ниитиниң чемненилгези, аъш-чем аймаа, чемге хамаарышпас барааннар база уран-чогаадылга тывыжы деп, каш кезекке чарган турган.