Закрыть
Логин:
Пароль:
Забыли свой пароль?
Войти    

Тываның чамдык суурларында ОРВИ база гриппке карантинни чарлаан

Тываның чамдык суурларында ОРВИ база гриппке карантинни чарлаан 11.02.2020
Эрткен неделяда грипп база ОРВИ талазы-биле эпидемиологтуг байдал нарыыдаан. Беш хонук дургузунда республиканың эмнелге албан черлеринде сезоннуг грипп аарыы дээш 5830 кижи келгени бүрүткеттинген. Эпидемиологтуг байдал 3,1 катап хөй. Аараан кижилерниң 76,2 хуузу 14 хар чедир назылыг бичии уруглар. Неделя дургузунда 165 аарыг кижини, оларның аразында 117 бичии уругларны эмнелгеде чыттырган.  
Кызыл хоорайда 10 муң чурттакчыга онааштыр 141,7, азы 1 853 кижи ОРВИ база грипптен аарааны бүрүткеттинген. 14 бичии кижини катай санаарга, 36 кижини эмнелгеде чыттырган.
Аарыгның өөскээни Мөңгүн-Тайга кожуунда 5,5, Чөөн-Хемчикте – 4,1, Каа-Хем кожуунда – 3,6, Чеди-Хөлде – 3,6, Барыын-Хемчикте – 3,1, Улуг-Хемде – 2,9, Бии-Хемде – 2,9, Таңдыда – 2,8, Чаа-Хөлде – 2,5, Өвүрде – 2,3 катап улуг.  
“В” халдавырлыг грипптен аараан 41 таварылганы лабораторлуг шинчилелдер бадыткаан. Пневмониялаан 22 таварылга эрткен неделяда демдеглеттинген.  
Роспотребнадзорнуң Тыва Республикада эргелели кожууннуң чурттакчылыг суурларында чон ортузунда грипп болгаш ОРВИ аарыының чавырылганы-биле, Кызыл кожууннуң өөредилге албан черлеринде кызыгаарлыг хемчеглерни ап кааптарын сүмелээн. Кызыл хооорайда база Кызыл кожууннуң Каа-Хем суурда каратинни февраль 10-дан ам-даа чеди хонукта узадыр. 
 Улуг-Хемниң Шагаан-Арыг, Чөөн-Хемчиктиң Чадаана, Бии-Хемниң Туран хоорайларның, Барыын-Хемчик кожууннуң Кызыл-Мажалык, Өвүрнүң Хандагайты, Каа-Хемниң Сарыг-Сеп, Таңдының Межегей, Мөңгүн-Тайганың Мугур-Аксы суурларда өөредилге албан черлеринче баарын февраль 10-дан хораан.  
ОРВИ база грипп аарыының дүшкүүрлүг үезинде “масканы” кедер, культура-массалыг, спортчу болгаш хөй кижи чыылган өске-даа хемчеглерни хоруур. Ажылчын коллективтерге эртенги хыналданы чорудар, уруглар садтарында чаштарның, өөреникчилер, студентилер аразында аарыг кижилерни аңгылаар. «Экодез», «Аквистин», «Аламинол», «Велтотен» дээн холуксаалар-биле хүнде ийи катап дезинфекциялыг арыглаашкынны кылыр. 
Школа автобузу дээн ышкаш, пассажирлер аргыштырар транспорт ажыглап турар организацияларга, аэропортка аарыг халдавырынга удур хемчеглерни күштелдирер. Ол ышкаш садыгларга, хөй-ниитиниң чемненилге черлеринге, культура объектилеринге, спорт залдарга база банкларга, харылзаа офистеринге, парикмахерскаялар база чараштаныр салоннарга, хөй кижилер чыглыр черлерге эпидемияга удур хемчеглерни сагыыр. 
 Хөй кижилер чыылган черлерже баарын шеглээр, бир эвес аргажок баар апарза, масканы кедер, арыг-силигниң чурумун сагыырын эмчилер чагаан.

Возврат к списку