Тываның Баштыңы Шолбан Кара-оол көдээ черлерде кадык камгалалының бирги звенозун эде дериирин негээн

 Ыраккы суур Мугур-Аксының эмчи ажылдакчызының эмнелге албан черинде рентген аппарадының аргажок байдалының дугайында бо хүннерде салган видеоролигин көргеш, Шолбан Кара-оол социал четкиде бодунуң арынында ону бижээн. 

«Ыраккы Мугур-Аксыда эмчивистиң дүвүрелээн сеткилин четкиде көрдүм. Ону анаа эртирип шыдавас мен” - деп, Шолбан Кара-оол демдеглээн.

 Февраль 5-те социал четкилерде парлаттынган видео Тываның Баштыңынга ындыг даалга бээринге үндезин болган. Мөңгүн-Тайга кожуун эмнелгезиниң эмчизи 80 чылдарда үндүрген “Арман” рентген аппарадын амдыгаа дээр ажыглап турарын көргүскен. «Ооң сөстеринге каттыжып, сагыш човап тур мен – деп, социал четкиде Шолбан Кара-оол бижээн. – Көдээ суурнуң эмчизи база эмчи дузазынга хереглелдиг көдээ чурттакчылар дээш дүвүрээзинниң айтырыы-дыр”. 

 Тываның Баштыңы чүгле төп эмнелге албан черлерин эвес, а ыраккы кожууннарны база дериг-херекселдер-биле четчелээр дээнинге каттыжып, хандырылга системазын эде көөр даалганы яамыга берген. Мөңгүн-Тайганың төп кожуун эмнелгези кадык камгалалының бирги звенозун чаарттыр программада киргени билдинген. Бо чылдың планы езугаар ол эмнелге чаа дериг-херекселдерни алыр.

Төрээн республиказында хөй чылдарда амыр эвес байдалдарда ажылдап турар кижилерни дыңнап, кандыг байдалда чурттап, профессионал ажыл-чорудалгазын кылып турарын билген турар ужурлуг деп, Тываның Баштыңы демдеглээн. «Эмчи кижиниң ажылы кончуг аар-берге. Ылаңгыя ыраккы суурларда амыр-дыш чок ажылдап чоруур кижилерге” - деп, Шолбан Кара-оол демдеглээн.