Кызыл хоорайның болгаш Кызыл кожууннуң школаларында карантинни чарлаан

Кызыл хоорайда грипптен аарыыры эпидемиологтуг деңнелди 2,9 катап ашкан. 2420 кижи эмнелге албан черлеринге келген. Ийи хар чедир чаштарның аарааны 85,3%, 3-6 харлыг чаштар аразында - 2,8 катап, 7-14 харлыг школачылар аразында - 4,2 катап, 15 хардан өрү болгаш улуг улус аразында 2, 5 катап көвүдээн.

Кызыл кожуунда эпидемиологтуг деңнел 2,5 катап ашкан. Кожуунда грипптээн 535 кижи эмчиден дузаны дилээн. Школачы назылыг уруглар ортузунда аарыгның өөскээни 3,7 катап хөй. 

Тывада эпидемиологтуг сезон эгелээнден, В гриппке хамааржыр 18 таварылга бүрүткеттинген. 

Росхереглел хайгааралының Тывада эргелелиниң сүмелээни-биле, Кадык камгалал яамызы иштики организацияларында маска чурумун киирген. Грипптен аараан кижилерни эмнелгеге чыттырары-биле орун фондузун эде хуваап, чонну хүлээп алырының ажылын онза чурумда чорудуп, бажыңче кыйгыртыгларны организастап, чугула эм-таң курлавырын белеткээн. 

Сезоннуг халдавырлыг аарыгларны болдурбас дизе, холду саваңнап доктаамал чуур, хөй кижилер чыылган черлерге масканы кедер, чылыдыр хептенир, хоолулуг чемнерни чиирин эмчилер сүмелеп турар.