Тываның Баштыңы Чадаана хоорайда сугга алыскан бажыңнарны хөмүр-биле хандырарын дааскан

 Январь 26-да Чадаана хемниң унундан чайынды суу агып баткан. Хем унунда чыдыпкан доштар сугну кызып кээрге, чер адааның суглары ооң кырынче үнүп келген. Кожуунда муниципалдыг деңнелдиң онза байдалын чарлаан, сугга алыскан бажыңнарның чурттакчыларын чайладып, түр када чурттаар черлерже чоруткан. Чурттакчыларның хөй кезии төрелдериниң бажыңнарында чеде бергенин кожуун чагыргазы дыңнаткан. Ажылчыннар сугга алыскан черниң суун өскээр чаяры-биле аар техниканы ажыглап турар. Чазак даргазының оралакчызы Олег Бадының чугаазы-биле алырга, специалистер ында ажылдап турар. 

Тываның Баштыңы Шолбан Кара-оол өскээр чайлаткан чурттакчыларны херек бүгү-ле чүүлдер-биле хандырын чогуур черлерден негээн. Сугга алыскан бажыңнарны хайгаарап, ооң чурттакчыларының одаар хөмүр-биле хандырарын айыткан. 

“Сугга алыскан бажыңнарның эр ээлери бажыңнарын кадарып чыдып каан. Хөмүр кажаалары суг адаанда барганы-биле бажыңнарын одаары чидиг айтырыг апарган. Чөөн-Хемчик кожуун чагыргазы база ОБ талазы-биле комиссия Тываның даг-руда компаняизы-биле кады Чадаананың хөмүр-даш уургайындан хөмүрнү бажыңнарже дажыырын шиитпирлээр даалганы бердим. Онза байдалдар үезинде чонну хөмүр болгаш чылыг-биле хандырар ажылды чогумчалыг чорудар херек” – деп, ТР-ниң Чазак аппарадының бөгүнгү хуралында чугаалаан.