Тываның Баштыңы Евгений Ромазановтуң чок болганы-биле кажыыдалын илереткен

Бо чылдың январь 17-де Красноярск крайның девискээринге болган автомобиль озал-ондаандан 51 харлыг Ромазанов Евгений Рифатович, өөнүң ишти Елена Валерьевна база 17 харлыг кызы Полина чок болган. Январь 21-де өг-бүле-биле чарлыышкынның езулалы болган. Евгений Ромазановтуң улуг кызы арткан. 

«Коргунчуг чидиригни силер-биле качыгдап, эгиттинмес когаралыңарны үлежип тур бис. Евгений Рифатович Ромазановтуң, ооң өг-бүлезиниң кежигүннериниң дугайында чырык сактыышкыннар оларны таныыр, оларның-биле кады ажылдап, өөренип чораан кижилерниң чүректеринге кезээ мөңгеде артар” – деп, ол кажыыдалында бижээн. 

Ромазанов Евгений Рифатович Кызыл хоорайның ЧКА-да дыка хөй чылдарда ажылдаан. Ол 1969 чылда Кемерово облазында Новокузнецк хоорайга төрүттүнген, дээди профессионал эртемниг. 1987 чылдың июньдан 1989 чылдың майга чедир Совет Армияның одуруунга шериг албанын эрттиргеш, «Шериг-агаар күштериниң тергиини» хөрек демдээ-биле шаңнадып, улуг сержант эргелиг халашкан. Тыва Республиканың Иштики херектер яамызында иштики херектер органнарынга 1992 чылдың декабрьдан 1999 чылдың октябрьга чедир албан ажылын күүсеткен. А 1999 чылдың октябрьдан 2001 чылдың августка чедир «НИЛМ» кызыгаарлаттынган харыысалгалыг ниитилелдиң директорунга ажылдаан. Кызыл хоорай чагыргазы 2001 чылдың августа «Амыдырал-хандырылга бажыңы» муниципалдыг унитарлыг бүдүрүлгениң директорунга томуйлаан. Ол-ла чылдың сентябрьда Муниципалдыг өнчүнү башкарар база оран-сава хуужудар талазы-биле агентилелдиң директорунуң эрге-хоойлу айтырыгларының талазы-биле оралакчызынга томуйлаткаш, 2008 чылдың январьга чедир ажылдаан. «Аварийлиг-септелге албаны» КХН-ниң директорунга 2009 чылдың августан бээр ажылдаан. 

Евгений Рифатович ажылдап чораан чылдарында харыысалгалыг, билиг-мергежилдиг, шынчы болгаш негелделиг удуртукчу бооп арткан. Кады ажылдап чораан эш-өөрү ооң эвилең-ээлдээн, а кижилер оларның айтырыгларын дүрген, шынарлыг шиитпирлептерин утпас.