Тываның Баштыңы федералдыг ведомстволар-биле сырый ажылдаарын айыткан

2019 чылдың февральда Чазак Даргазы Дмитрий Медведевтиң удуртуп эрттиргени тускай хурал соонда, ол план дээш ажыл эгелээнин сагындыраал. Регионнуң удуртукчузу Шолбан Кара-оол Тываны хөгжүдеринче угланган тускай хемчеглер дугайында айтыышкын Медведевтиң халашканы-биле өскерли бербес деп чугаалаан. Харын-даа олар федералдыг чазактың чаа составының планынче шилчип, улам ону тодарадыр апаар деп, сагындырган.

«Федералдыг чазакты дүжүргени-биле, чаа сайыттарны томуйлаарын манап, анаа олурган ажыы чок. Ол дыка шын эвес бодал. Чазак ажылдап турар болганда, сайыттар хүлээлгелерин күүседир, а Тываны хөгжүдер талазы-биле онзагай хемчеглер планы күштүг бооп артар, оларны федералдыг яамыларның 2020 база дараазында чылдарда ажыл-чорудулгаларында быжыглаан. Ынчангаш сула салдынып, ажылды кошкаткан ажыы чок, а харын-даа федералдыг коллегалар-биле сырый болгаш туруштуг ажылдаар херек. Оралакчы дарга А.В. Брокерт баштаан шупту сайыттарывыска республика хөгжүлдезиниң хууда планының төлевилелинде база ооң кезектеринде хүлээп алган протоколдарны база шиитпирлерни хынап көөр даалганы онаадым. Ол бүгү документилер силерниң холуңарга турар ужурлуг. РФ-тиң Чазааның чаа составы-биле план дээш ажылывысты уламчылаар барымдаалыг үндезинивис ол” – деп, республика Баштыңы бодунуң блогунда бижээн.