Тываның орук-транспорт комплекизиниң сайыдының оралакчызы:

- Эрткен чылдың үре-түңнелдерин үндүрүп тура, чаңгыс чер-чурттугларымның чедиишкинниг бир демниин демдеглеп, чаа үнген чылда Россия Федерациязының өске регионнары-биле Тыва Республиканы харылзаштырган регионнар аразының авиамаршруттарын калбартырынче кичээнгейни углаарывысты сонуургадыйн. Москва база Сибирьниң хоорайлары - Красноярск, Иркутск, Новосибирск-биле авиааргыжылгалар чедиишкинниг боттанып турар. Марттың 1-ден Абакан биле Томскиже рейстер ажыттынар. Кызыл хоорайда аэропорттуң делегей чергелиг эрттирилге пунктузун база «Хандагайты» хөй талалыг эрттирилге черин чаагайжыдар ажылдар бо чылын уламчылаар. 

Федералдыг орук агентилели болгаш Хакас Республиканың Транспорт яамызы-биле Абакан – Абаза – Ак-Довурак автоорукту федералдыг оруктар даңзызынче киирер дугайында дугуржулга хемчеглерин февраль 3-ке чедир эрттирери планнаттынган. Тыва Республиканың Баштыңы Шолбан Кара-оолдуң “Хөгжүлдениң чаа энергиязы. Тывага чурттаар. Тывага чоргаарланыр” деп айыткалында «Сибирь дугуржулгазы» регионнар аразының ассоциациязы Сибирьниң барык шупту регионнарын каттыштырган кызыгаарлар аразының Моолче болгаш Кыдатче коридорун Тыва таварты тудар талазы-биле улуг төлевилелин ажылдап кылып турарын дыңнаткан. 

Шынарлыг, айыыл чок оруктар – кижилерниң амыдырал-чуртталгазының шынарын илереткен экономиканың чугула адырының бирээзи. Ол ажыл-агыйны бурунгаар шимчедиринге база идиглиг. «Тываавтоорук», Кызыл хоорайның мэриязы база Кызыл кожуун чагыргазы-биле кады, 38,821 км автомобиль оруктарын ажыглаарынга таарымчалыг кылдыр 2020 чылдың төнчүзүнге чедир кылыры планнаттынган. Регион болгаш тус чер ужур-дузалыг автомобиль оруктарынга септелге ажылдарын чорудар дугайында керээлерни часка чедир чарар. Айыттынган хемчеглер республиканың ажыл-агыйжы амыдыралын диргизип, чаа деңнелдиң шынарынче көдүрер. Оон аңгыда кожа-хелбээ регионнарның болгаш бистиң чурттуң экономиктиг күчү-шыдалын көдүреринге үлүүн киирер ужурлуг.