Тываның Баштыңы республика чазаанда кадрлар өскерлиишкиннерин кылган

Республика Баштыңы Шолбан Кара-оол юстиция база орук-транспорт комплекизиниң сайыттары Аяс Оюн биле Олег Бадыны Тыва Республиканың Баштыңының оралакчылары кылыр шиитпирни үндүрген. Декабрь 16-да аппарат хуралында ооң дугайында дыңнаткан. Томуйлатканнар парламентиниң бадылаарынга чедир Тыва Республиканың Баштыңы-Чазааның Даргазының оралакчызының хүлээлгезин күүседип турар статуска ажылдаар. 

 Тываның Баштыңы Шолбан Кара-оол юстиция сайыдынга хамаарыштыр чуртта чоруп турар тус чер бот-башкарылга реформазы-биле холбаштыр ындыг шиитпирни хүлэп алганын чугаалаан. Аяс Оюнга муниципалдыг девискээрлерни хөгжүдер айтырыгларны удуртуп, таарыштырар даалга онаашкан.  

2020 чылда инфраструктура объектилеринде ажылдарның хемчээли улгатканы-биле, орук-транспорт комплекизиниң сайыды Олег Бадыны вице-премьер кылдыр томуйлаанын Тываның Баштыңы тайылбырлаан. 

 Республика Баштыңы Шолбан Кара-оол бо неделяда хүлээп алган кадрлар айтырыынга хамааржыр өске-даа шиитпирлерин дыңнаткан. Чазактың ийи вице-премьерлери – Анатолий Дамба-Хуурак биле Аяс Монге халашкан. Баштайгызы республиканың чазак аппарадын удуртуп турган болза, ийи дугаары – Тываның Баштыңының канцеляриязын. Анатолий Дамба-Хууракты тускай шинчилелдер институдунуң директорунда томуйлаан. Ол Тываның Хөй-ниити палатазын база удуртур. Аяс Монге өске ажылче шилчээни-биле халашкан.  

Чазактың эрге-хоойлу камгалаар органнар-биле кады ажылдажылгазын харыылап турган вице-премьер Аяс Чудаан-оол база халашканын сагындыраал. Кадык камгалал сайыды Орлан Донгак эки тура-биле халажып турары ол-ла аппарат хуралында билдинген. Ындыг болзажок О. Донгак командада хевээр артканын Шолбан Кара-оол дыңнаткан. Эмчи эртемниг, Эрзин база Кызыл кожууннар чагыргаларын даргалап турган Артыш Сат ол олутту ээлээр. Муниципалдыг деңнелде элээн чедиишкинниг ажылдаан кадрларны бурунгаар шимчедир арга-биле А. Сатты томуйлаанын республика баштыңы демдеглээн.

Информатизация болгаш харылзаа сайыды Рустам Грицюкту халап, ТР-ниң Баштыңының чөвүлекчизинче шилчиткени яамы деңнелинде көскү өскерлиишкин болган. Тываның Баштыңының чөвүлекчилер албанының удуртукчузу Марина Чанзанны ооң орнунда томуйлаан.  

Шолбан Кара-оол эде тургузуушкуннарны база томуйлаашкыннарны тайылбырлап тура, чазак даргазының удуртукчуларының харыылаар черлерин болгаш кижи бүрүзүнүң кылыр ажылын чиге айыткан. Чаа томуйлаткан вице-премьерлерден аңгыда, республика чазаанда ам-даа дөрт оралакчы даргалар барын сагындыраал. Тываның Чазааның даргазының бирги оралакчылары албан-дужаалдарда экономика адырын харыылап турар Александр Брокерт, вице-премьер албаны-биле кады бойдус курлавырлары болгаш экология сайыдының ажылын кылып турар Шолбан Хопуя олар-дыр. Оон аңгыда вице-премьерлер Органа Натсак (социал адыр) база ТР-ниң Баштыңының Администрация база ТР-ниң Чазааның Аппарат удуртукчузу Александр Щур база бар.