Тываның күрүне университединиң ректору Ольга Хомушку Тываның Баштыңының айыткалының дугайында – аныяктарга дорт кыйгырыгны онзазындым

Тываның Баштыңы Шолбан Кара-оол декабрь 12-де Тыва Республиканың Дээди Хуралынга чылдың-на бээр айыткалын кылган. Аңаа чазак кежигүннери болгаш парламент депутаттары, муниципалдыг тургузуглар удуртукчуларындан аңгыда, эрге-чагырганың федералдыг девискээр органнарының төлээлери, хөй-ниити каттыжыышкыннарының база организацияларның баштыңнары киришкен. 

Айыткал таныштырган ёзулалдың киржикчилери программалыг документиге хамаарыштыр үзел-бодалын үлешкен. 

- Айыткал дыка тодаргай-дыр. Чүнү кылып шыдаваанынга түңнелдерни үндүрүп, келир үеде кандыг айтырыглар чидиг бооп турарын, ооң-биле канчаар ажылдаарын ында айыткан. Аныяктарга дорт кыйгырыгны кылганынга таарзындым. Күрүне органнарында албан-дужаалдарны аныяктарга бүзүрээн, олар социал-экономиктиг хөгжүлдениң дорт шимчедикчилери апарган. Аныяктар чогаадыкчы, шиитпирлиг, а улугларның арга-дуржулгазы база билиглери-биле каттышкаш, кандыг-даа айтырыгларны шиитпирлептер улуг күштүг. Бистиң көдээ ажыл-агыйывыс инновастыг арга-хевирлерни ажыглап эгелээр дээн чугаа бүзүрелди оттуруп турар. Чүгле чаңгыс чаңчылчаан арга-хевирлер дүрген хөгжүлдени магадылавас. А бир эвес суурлар амгы үеге дүүштүр хөгжүп эгелээр чүве болза, аныяктар эртем-билиг чедип алгаш, ээп чанып келир аргалыг. Ол дээрге чаңгыс аай социал-экономиктиг девискээр апаары-дыр.