Эң-не идепкейлиг бижикчи

Тываның Баштыңы Аныяктар хүнүнде социал четкиде эң-не идепкейжи бижикчиге Ipad интернет-планшетти тывыскан.

Найысылалдың төвүнге, Арат шөлүнге, чыглып келген хөй санныг аныяктарга Тываның Баштыңы Шолбан Кара-оол Аныяктар хүнү-биле байыр чедирген. Онза хүндүткелди ол бодунуң «Вконтакте» бижикчи өңнүктеринге илереткен. Аныяктар байырлалының киржикчилериниң аразындан социал четкиде ооң өңнүктери бар бе деп айтырыгга барык шупту холдарын көдүрген. Ынчалзажок оларның аразындан чүгле чаңгыс кижи — 25 харлыг Ирина Шагжиду, Чазак Даргазындан Ipad интернет-планшетти белек кылдыр алган. Ол эң-не идепкейжи бижикчи болган. Тываның Баштыңы ооң 558 лайктарын болгаш 259 репостарын санаан. Шолбан Валерьевичиниң ол хенертен болган шиитпири аныяк уругнуң бичии дүвүрелин болдурган-даа болза, ол сценаже үнүп, чыылганнарның деткээн адыш часкаашкыннарының үделгези-биле белекти улуг хүндүткел-биле алган. Чазак Даргазы аныяктарга сеткилиниң ханызындан байыр чедиргеш, тергиин хөөннү күзээн. Ол республиканың келир үези аныяктарның холунда дээрзин демдеглээн.

Тывага Аныяктар хүнү июнь 27-ден 29-ка чедир болган. Дөгээ даанга аныяктарның экологтуг акциязы болуп эрткен. Арат шөлүнге албан черлериниң, аныяктарның хөй-ниити организацияларының төлээлери мобильдиг шөлчүгештерден мергежил, сезоннуг ажылга тургустунарының, медицина профилактиказының талазы-биле консультацияларны эрттирген. «Тываның аныяктары» деп байырлыг концертке аныяктарның хөй-ниити организацияларының идепкейжилерин шаңнаан. Июнь 28-те Азия төвүнүң тураскаалының чанынга аныяк өг-бүлелерниң бадыланыышкынының байырлыг хемчээ болган. ТывКУ-нуң кол корпузунга «100 чылче базымнар» деп интеллектуалдыг брейн-ринг болуп эрткен.

Июнь 29-та «Мээң соомдан маңна» деп Олимпий хүнүнге тураскааткан аныяктарның массалыг чарыжы планнаттынган. Чыглыры Сүбедей спорт комплекизиниң чанынга 10 шакта. Ол-ла хүн Совет Тываның 5 чылы аттыг стадионга 35 харга чедир мөгелер аразынга хүреш маргылдаазы болган. ТР-ниң Өөредилге болгаш эртем яамызының конференцзалынга «Тыва Республиканың студент отрядтарының кежигүннерин ажылче хаара тудары-2013» деп темага ажыл берикчилериниң, отрядтар командирлериниң киржилгези-биле «төгерик стол» болган.

Республиканың районнарынга чогаадыкчы кежээлер болгаш спортчу хемчеглер болуп турган.