Эң шылгараан доозукчуга

Июнь 23-те, воскресеньеде, бүгү школаларга доозукчулар кежээлери болган. Кызылга чаңчыл езугаар оларга байырны Арат шөлүнге чедирген, аңаа оолдар, уруглар школачы вальсты танцылааннар.

Ооң соонда байырлал төрээн школаларынга уламчылаан, аңаа башкылары, ада-иелери-биле кады хөөрежип, өөренип эрткен чылдарын сактып шаг болганнар. Тываның Чазааның Даргазының оралакчылары, сайыттар, а ол ышкаш республика Баштыңының бүрүн эргелиг төлээлери школачыларның ол кежээлеринге барып, доозукчуларга чагыг-сөзүн бергеннер.

Тываның Баштыңы Шолбан Кара-оол Кызыл хоорайның №1 школазынга барган болгаш, эң идепкейлиг доозукчу Амырга Тавакайга бодунуң хуу белээн тывыскан. Школа директору Раиса Хайманованың чугаалап турары-биле алырга, идепкейлиг хамааты туружу-биле ол оол өскелерден онзагай болуп турар. Амырга — дыка хөй социал төлевилелдерниң автору, школа коллективинде эң шимченгир болгаш эки өөредилгелиг.

Амырга бүдүн өскүс, азыраан өг-бүледе чурттап турар-даа болза, ол бөдүүн эвес сорулганы бодунуң мурнунда салган. Аңаа белек тыпсырының дугайында Тываның Баштыңының шиитпирин өөреникчилер диңмиттиг адыш часкаашкыннары-биле болгаш деткиишкин кыйгылар-биле уткааннар. Ындыг чорук өөрүнүң Амырганы үнелеп турарының бадыткалы-дыр деп, Шолбан Кара-оол демдеглээн. Чүткүлдүг оолду Чазак Даргазы мактаан болгаш улуг-улуг чедиишкиннерни күзээн. iPad 2 деп аажок үнелиг белекти республика удуртукчузундан алыр деп черле бодавайн чораанын Амырга дыңнаткан. «Бо меңээ дыка чугула белек-тир, моон соңгааргы өөредилгеге ол херек апаар. А кол-ла чүве Силерниң кичээнгейиңер болду, ол дээш башкыларымга, Шолбан Валерьевичиге өөрүп четтирдим» — деп, доозукчу чугаалаан.

Өөредилге черлеринге эки өөренирин, чурттуң өске улуг-улуг хоорайларынга чорааш, төрээн Тывазын утпазын регионнуң удуртукчузу чалыыларга күзээн.