Тываның Баштыңы хораннанган кижилерниң кадыының дугайында кадык камгалал сайыдының дыңнадыы-биле танышкан

Сайыттың медээзи-биле алырга, июль 14-тен 18 хүннеринге чедир ижин аараан 155 таварылга бүрүткеттинген, 45 бичии уруглар ооң санында. Республикада 80 кижини, ооң аразында 25 бичии кижилерни эмнелгеде чыттырган: 

- «Халдавырлыг аарыглар эмнелгези» ТР-ниң КБКА-да 61 кижи, 18-зи – бичии уруглар; 

- Таңды кожуунда 13 кижиниң 5-жи бичии уруглар;  

- Улуг-Хем кожуунда 4 аарыг кижиниң 1-зи – бичии уруглар;  

- Сүт-Хөлде – аараан 12 кижиниң 1-зи – бичии уруглар;  

- Кызыл кожуунда - 2 улуг кижи аараан. Аарыг кижилер ниитизи-биле суларап, эъдиниң изии 37-40 градус чедип, ишти-хырны аараан. 

«Июль 18-тиң хүнү-биле алырга, аарыг кижилерниң байдалы ажырбас, компекстиг эмнээшкинни берип турар – деп, Орлан Донгак дыңнаткан. – Халдавырлыг ижин аарыгларынга тускай эмчи дузазын чедирер аргалар-биле аарыг кижилерни шинчип, эмнээн».  

75 аарыг кижиниң, оларның аразында 25 уругнуң байдалы экижээни-биле амбулаторлуг эмнээшкинни уламчылаар кылдыр үндүр бижээнин сайыт тайылбырлаан. 

Участок эмчилериниң хайгааралынга алыры-биле эмнелгеге чытпаан аарыг кижилерниң даңзызын «Республиканың уруглар эмнелгези» ТР-ниң КБКА, «Республиканың 1 дугаар эмнелгези» ТР-ниң КБКА, «Хоорай поликлиниказынга» дамчыткан. 

Роспотребнадзор эргелелинче, «Тыва Республикада гигиена болгаш эпидемиология төвү» КФБА-же эмчи дузазын дилээн аарыг кижилер дугайында дарый дыңнатканын «Халдавырлыг аарыглар эмнелгези» ТР-ниң КБКА-ның кол эмчизи Анна Сарыглар чугаалаан.  

«Эпидемиологтуг байдал, клиниктиг болгаш лабораторлуг көргүзүглерден көөрге, «Salmonella enteritidis»-дан сальмонеллез халдавырындан аарыг өөскээн деп түңнелди үндүрген» - деп, кол эмчи демдеглээн. 

Тываның Баштыңы Шолбан Кара-оол кижи бүрүзүнүң, ылаңгыя уругларның байдалынга хайгааралды кошпатпазын дааскан. Хөй кижилерниң хораннанган чылдагаанын тодарадып, буруулуг кижилерни, албан-хаакчыларны база, илередир даалганы ол берген.