Закрыть
Логин:
Пароль:
Забыли свой пароль?

Войти    

Тываның Баштыңы спортчуларга эмчи үделгезиниң системазын тургузарынче «Победа» хуу ачы-дуза фондузун хаара туткан

Тываның Баштыңы спортчуларга эмчи үделгезиниң системазын тургузарынче «Победа» хуу ачы-дуза фондузун хаара туткан 09.06.2018
Тываның чазаа Россияның чыынды командаларында кирип турар спортчуларга эмчи үделгезиниң системазын тургузар сорулгалыг. 
«Победа» ачы-дуза фондузунуң тургузукчуларының бирээзи - Тыва чурттуг, Москвада эмчи Артыш Ондар ол төлевилелде кол партнер болур. Республиканың Баштыңы Шолбан Кара-оол Артыш Ондар-биле ужурашкаш, «Победа» фондузунга ол төлевилелди удуртурун сүмелээн. Чазак даргазы оларның аразында дугуржулга болганын бодунуң блогунда дыңнаткан. 
«Тыва спортту чаа деңнелче үндүрүп болур кижи тыптып келди ышкаш. Ол чугаа бистиң профессионал спортчуларывыска шынарлыг эмчи үделгезиниң дугайында. Специалистерниң чугаазы-биле, амгы спортта ол чокта, чурттуң бирги черинден өрү көдүрлүрү болдунмас. Ол кижи – аныяк доктор, ортопед-травматолог Артыш Ондар-дыр. Артыш эрткен күзүн спортчуларга дуза көргүзер угланыышкынныг "Победа" фондуну ажыткан. Аравыста дыка таптыг чугаалаштывыс, тыва спортчулар-биле тускай сорулгалыг ажылдаарын сүмеледим. Холдарывыс тудуштувус. Ол ажылды кым-на-бир кижи эвес, а бистиң чаңгыс чер-чурттуувус, боттуң кижизи база класстыг эмчи удуртуп баштаар болганынга өөрдүм» - деп, Тываның Баштыңы бижээн. 
Травматология база ортопедияда тускай мергежилдиг эмчилер, Артыш биле Айдыс Ондар алышкыларның эгелээшкини-биле 2017 чылдың сентябрьда, «Победа» ачы-буян фондузу тургустунган. Организация Москвада бүрүткеттинген, спортчуларга эмчи болгаш социал дуза көргүзер ажыл-чорудулгалыг фонд болур. Артыш Ондарның чугаазы-биле алырга, фонд профессионал спортчуларның, спорттуң хоочуннарының база анаа спортчуларның профессионал кемдээшкин-берттиниишкинин эмнеп, реабилитация эртеринге акша чыыры-биле кызыгаарлаттынмаан. «Бис боттарывыс күжүвүс база ол ышкаш, Москваның профессионал терапевтери, хирургтары, реабилитологтары, спортчу аарыглар болгаш кемдээшкиннер талазы-биле ажылдап чоруур специалистер-биле дузаны кадарынга белен бис» - деп, ол чугаалаан. 
«Победа» фондузу бодунуң ажыл-чорудулгазының шөлүнде бирги базымынга Тываны шилип алганы онза. Делегей чергелиг маргылдааларда киржип чоруур элээн каш тыва спортчулар дузаны алган, кемдээшкин соонда, эмнедип, сегээн.  
Тываның Баштыңының бо саналы, спортчулар-биле чүгле берттине бергенде эвес, а доктаамал ажылдаар арганы фондуга бээр. Национал чыынды командалар дээш киржип, бедик көргүзүглерни чедип алган тыва спортчуларның саны чылдан чылче көвүдээн. Амгы үеде, делегей маргылдааларында Россияны төлээлээн командалар составында, Тывадан 64 спортчу бар. 
Тыва спортчуларның эң-не бедик көргүзүглерлиг спортчу хевирлеринге, ийи кижиниң тулчуру эң-не айыылдыг оюннар кирип турарын демдеглезе чогуур. Оларның аразында хостуг хүреш, самбо, дзюдо, бокс, кикбоксинг база оон-даа өске хевирлер бар. Спортчуларга эмчи үделгезиниң мергежилдиг албанын тургузуп база хөгжүдери, аныяктарның профессионал спортче сонуургалын каш катап улгатырып, а амгы чемпионнарның улуг спортка чедиишкинниг киржилгезин ам-даа узадыр деп, Шолбан Кара-оол санап турар.

Возврат к списку