Тывадан уруглар Красноярск крайда «Тесь» санаторийниң «чайгы» бирги бөлүүнче аъттаныпкан

Кадыкшылга дыштанылгазынче аъттанган 37 уругнуң 23-ү өскүс болгаш ада-иезиниң хайгааралы чок арткан, 3-ү - кадыкшыл байдалы кызыгаарлыг, 6 уруг – амыдыралдың берге байдалында, 1 уруг – азырап алган өг-бүледен. 

Россияның Кадык камгалал яамызының санаторлуг албан черлеринге федералдыг болгаш республика саң-хөө акшазы-биле 2,5 муң назы четпээннерни бо чылын кадыкшыдарын планнаан. Чылдың-на ол сорулгага 20 млн. ажыг рубльди тускайлап турар. 

Бо чазын чурттуң регионнар санаторийлеринге 932 уруг дыштанган. «Озеро Шира» уруглар санаторийинге – 701 уруг, «Белокуриха» санаторийге – 166 уруг, «Пионер» биле «Пушкинский» туберкулезка удур санаторийлерге - 14 уруг кадыкшылын быжыглаан. Бо дыштанган ургаларның 638-зи – эвээш орулгалыг, хөй ажы-төлдүг, долу эвес өг-бүлелерден, 45 уруг – инвалидтер. 2018 чылдың чайгы үезинде ивилерниң 18 ажы-төлүн дыштандырары планнаттынган.  

Ооң мурнунда чылга деңнээрге, 2017 чылда санаторлуг-курорт ачы-дузазын алган уругларның саны 2604 кижи хөй. Ол ачы-дузаларны төлээринге 18 млн. 886 муң рубль акшаны , уругга путевканы боттары садып алганнарның (ада-иелерниң база хоойлу езугаар төлээлериниң) чарыгдалын эгидеринге 114 муң рубльди чарыгдаан, а арткан акшаны – туберкулезка удур уруглар санаторийлеринче чоруур уругларның база ону үдеп чоруур кижилерниң оруунуң өртээнче киирген.  

Санаторлуг-курорт эмнээшкининче чоруткан уругларның ниити санының 78,8 хуузу - онза категорияның уруглары. Тываның Баштыңының даалгазы-биле, уруглар сөөртүлгезин шыңгыы организастаар хемчеглерни, уруглар санаторийлеринге дыштанып турда, озал-ондактан база кемдеп-берттинеринден камгаладылганы санаторлуг-курорт организацияларының акша-хөреңгизи-биле кылырын чедип алыр.