30.05.2018
Уруглар камгалалының хүнүнде Тываның болчукчулар палатазы база Республиканың юстиция яамызы юридиктиг халас дуза чедирер хүннү эртирер.
Шак бо хемчег Россияның адвокаттарының федералдыг эвилелиниң «Болчукчулар - хамаатыларга» деп бүгү чуртка болуп эртер акциязынга даянган. Июнь 1-де 10 шактан 15 шакка чедир Кызыл хоорайга, кожууннарга 11 шактан 14 шакка чедир шупту болчукчулар чаңгыс дем-биле чонну хүлээп алыр. Хамаатылар бо хүнде янзы-бүрү айтырыгларга харыыны алыр аргалыг болур. Ылаңгыя кеземче хоойлузунга, өг-бүле херектеринге, үндүрүг талазы-биле, сайгарлыкчы чорук дээш оон-даа өске угланыышкынныг айтырыгларга сүмелерни болчукчулардан ап болур.
Эң ылаңгыя ол хүн уруглар камгалалының, оларның эрге-ажыын камгалаар талазы-биле айтырыгларны онза тайылбырлап бээринге беленин болчукчулар болгаш юстиция яамызының ажылдакчылары дыңнадып турар. Назы четпээннерниң хууда айтырыглары, олардан алдынган медээ чажыт болуп артар. Кожууннaрда болчукчуларга чонну хүлээп алыр талазы-биле чогуур барымдааны тус чер чагыргалары тургузар. Кызылга дараазында болчукчулар коллегияларынга хамаатыларны хүлээр:
• «Правозащитник», Кечил-оол кудумчузу, б. 5 кв. 3;
• «Правовая помощь», Кочетов кудумчузу, б. 35 кв. 409;
• «Кызылская городская коллегия адвокатов», Тувинских добровольцев кудумчузу, б. 13 оф. 222;
• «Адвокат», Интернациональная кудумчузу, б. 14;
• «Сысонов и партнеры», Красноармейская кудумчузу, б. 178 кв.82;
• «Центральная коллегия адвокатов», Кочетов кудумчузу, б. 35 кв.405;
• «Наш адвокат», Красноармейская кудумчузу, б. 237 (бажыннын барыын талазында)
Юридиктиг халас дуза чедирер хүнде Тываның юстиция яамызы, Кызылдың Калинин кудумчузунуң 1 б (машзавод) 202 «в» дугаар кабинединге, 10 шактан 15 шакка чедир чонну хүлээп алыр. Харылзажыр телефону: 8(394-22) 6-35-47