Тываның Баштыңы хөмүр-даш уургайынга мөчээн дагжының дугайында дыңнаткан

Понедельникте, Тываның Таңды кожуунда "Межегейхөмүр БК" КХН-ниң шахтазынга, айыыл-халап болган. 79 кижи чер кырынче үнүп келген болза, 1 шахтер тывылбаан. РФ-тиң Истелге комитединиң республикада истелге эргелели бо болуушкунга хамаарыштыр истелге мурнунуң хыналдазын чоруткан. Четверг кежээзинде, республика чазаанга участоктуң начальниги болур кижиниң мөчүзү тывылганын дыңнаткан. Амгы үеде судмедэксперттер ооң-биле ажылдап турар.

 "Дагжы Пикулев Андрей Александровичиниң мөчүзү чаа-ла тывылган. Ол Кемерово облазының Белов хоорайдан кээп ажылдап турган. Участок начальниги болуп, шахтада өрүмнээр ажылдар талазы-биле рекордту тургускан өрүмнекчилер бригадазының удуртукчузу чораан. Орукту ажыдып, күш-ажылы-биле хөйнү кайгаткан дагжыларга чоргаарланып, оларны мактап турдувус. Төрээн кижилери-биле кады качыгдадывыс. Ол езулуг командир ышкаш мөчээн: баштай ажылчыннарын камгалааш, оон боду үнер бодаан. Бодунуң амы-тынын артында каггаш, ынчаар кылган-даа» деп, Кара-оол бодунуң арынында бижээн.