Тывада 2000-2002 чылдарда төрүттүнген оолдар, уруглар аразынга хол бөмбүүнге бирги чер дээш маргылдаа чазактың деткимчези-биле эртип турар

Маргылдааның киржикчилери - 2000-2002 чылдарда төрүттүнген оолдар, уруглар. Тере-Хөл кожуундан аңгыда, республиканың шупту кожууннарындан 24 оолдар база 24 уруглар командалары Кызылда четкилеп келген. Маргылдааның кол шииткекчизи Саая Менди Анатольевна, кол секретары – Монгуш Гульмира Владимировна.  

Хол бөмбүүнүң талазы-биле спортчу разряд алыр болганындан, маргылдаа чидиг. ТР-ниң Аныяктар херээ болгаш спорт яамызының медээзи-биле алырга, бо маргылдаа албан езузунуң аккредитациязын эрткен болгаш спортчу разрядтарны тыпсыр эргелиг. Чаңгыс аай бүгү-российжи спортчу квалификация дүрүмү-биле, 18 харга чедир оолдар, уруглар аразынга бирги база ийиги черни алган командалар спорттуң «волейбол» хевиринге II спортчу разрядты алыр.

Республиканың бирги чери дээш хол бөмбүүнге маргылдааның тиилекчилери бөгүн шылгарап үнер.