Закрыть
Логин:
Пароль:
Забыли свой пароль?

Войти    

Тываның Баштыңы ТР-ниң Культура яамызынга башкарыкчы артистерниң халас гастрольдарын республикага организастаарын дааскан

Тываның Баштыңы ТР-ниң Культура яамызынга башкарыкчы артистерниң халас гастрольдарын республикага организастаарын дааскан 23.03.2018
Тываның Чазаа күрүне чагыы-биле 32 млн. ажыг рубльди республиканың чурттакчыларынга билдингир артистерниң болгаш чогаадыкчы коллективтерниң 2018 чылда концерт программаларынче шилчидер. 
Тываның Баштыңы Шолбан Кара-оол концерт ажыл-чорудулгалыг коллективтерниң удуртукчулары-биле ТР-ниң Культура яамызының келир чылда ажыл-планнарын сайгарган. Тываның национал оркестри чазак даргазынга 2017 чылда күрүне чагыын күүсеткенин база чаа сезонда планнарын илеткээн. 
Оркестрниң удуртукчузунуң медээзи-биле алырга, коллектив эрткен чылын хемчеглер санын 20 хуу көвүдеткен. Оркестрниң концерттерин 20 муң ажыг көрүкчү көрген. Оларның үштүң бир кезии аныяктар болганы оркестрниң репертуарының кол өзээн тургускан классиктиг болгаш национал музыкага сонуургалдың өскенин херечилеп турар. Оон аңгыда оркестр концерт программазын чаарткан, хөгжүмге ынактарга абонент билеттерин садып, көрүкчүлер санын көвүдеткен. Оркестр тыва национал хөгжүм херекселдеринге күүседикчилер мөөрейин бир дугаар организастап эрттирген.  
Тываның Баштыңы Шолбан Кара-оол артистерниң эки ажылы база чогаадыкчы чоруу, Тываның чедери берге эң-не ыраккы суурларында көрүкчүлерни концерттеринче хаара тудар дээн чүткүлү дээш, өөрүп четтиргенин илереткен. Республика Баштыңы концерт программаларынга күрүне чагыы-биле артистерниң үнүүшкүннүг оюн-көргүзүүн ам-даа көвүдедирин дилээн.  
«Улуг, бичии дивес концерттер, чогаадыкчы кежээлерге дыка ынак бис, бичии суурга хөйге чарга билдингир коллективтер азы артистер кээрге – ол дег өөрүшкү чок деп болур. Культура яамызы гастрольдаар бүгү байдалдарны хандырарын диледим. Ылаңгыя бо чылын юбилейлеп турар Тыва национал оркестрге. Бистиң хөгжүмчүлеривис 15 чыл дургузунда хөйнү чедип алганын билир мен. Оркестр бөгүн чоннуң ужур-чаңчылдарын, тыва хөгжүмнү нептередир, уран чүүлче аныяктарны хаара тудар дээш, долу күжү-биле ажылдап, дыка хөй ажыктыг чүүлдерни кылып турар. Ол төлептиг үнелелди болгаш деткимчени алыр ужурлуг» - деп ол санаан.

Возврат к списку