30.01.2018
Тываның Баштыңы Шолбан Кара-оол хостуг хүрешке «Гран при Иван Ярыгин» делегей маргылдаазында киржип турар Россияның чыынды составында тыва спортчуларны деткип четкен. Январьның 26-28 хүннеринде Красноярскиге эрткен маргылдаага делегейниң 21 чурттарындан мөгелер киришкен.
Маргылдааның хүндүлүг аалчылары – Тыва Республиканың Баштыңы Ш. Кара-оол биле Моолдуң алдар аттыг суможузу Д.Дагвадорж хүлер медальдарга төлептиг болган Начын Куулар биле Хүреш-оол Дондук-оолду шаңнаан.
«Маргылдааның бирги хүнү. Хевисче бистиң мөгевис Хүреш-оол Дондук-оол 57 килге хүрежип үнген. Билдингир америк спортчуну сөөлгү салыгда тиилээш, «Гран-При Иван Ярыгин» делегей маргылдаазының хүлер медалын чаалап алды. А Начын Куулар Азияның болгаш Моолдуң чемпиону, моол мөгени тиилээн» - деп, Тываның Баштыңы Шолбан Кара-оол бодунуң бижидип алыкчыларынга дыңнаткан.
Маргылдаа үезинде республика баштыңы российжи чыынды команданың тренерлери-биле ужурашкан.
«Бистиң спортчуларывыстың салым-чолу Россияның чыынды командазының алдар-аттыг тренерлериниң холунда. Красноярскиниң хүреш школазының үндезилекчизи болгаш эң кол кижизи Дмитрий Георгиевич Миндиашвилиден, чыынды мөгелерниң кол тренери Джамболат Ильич Тедеевтен мээң оолдарымны хайгаарап турарын диледим» - деп, республика Баштыңы бижээн.
А алдар аттыг моол суможу Д.Дагвадорж-биле Тывага удавас болур маргылдааны сайгарып көрген. «Күчүлүг Асошори-дир. Шын дөмей-дир бис бе? Чоок төрел чоннарның оолдары ындыг болбайн канчаар. Моолдуң президентизиниң чөвүлекчизи-биле чайын Кызылга, июль ортан үезинде болур хүрешке делегей маргылдаазын сайгарып чугаалаштывыс».
Тываның Баштыңы Шолбан Кара-оол понедельникте, «Гран при Иван Ярыгин» делегей маргылдаазынче чораанынга түңнелди кылган:
«Бирээде, бистиң чаңгыс чер-чурттугларывыстың ол маргылдаага сонуургалы улуг-дур. Залда аарыкчыларның чартыы Тывадан болду. Хереглел болгаш сонуургал бар болганда, кижилерниң аай-дедир аргыжылгазының айыыл чок чоруун хандырар херек. Маргылдааже организастыг үнүүшкүн-даа бооп болгай-ла. Кижилерге-даа таарымчалыг, аргыжылганы кылып турар кижилерге-даа ажылдап алыр арганы бээр. Меценаттар база киржип болгай. Оон аңгыда, бистиң спортчуларывыска эмчи үделгезин хандырар шыңгыы негелдени тургустум. Спорттуң аңгы-аңгы хевирлеринге Россияның чыындызынче кирип турар спортчуларның эмчи үделгезиниң, реабилитациязының, кадыкшылгазының доктаамал системазын тургузар. Витаминнер ижеринге болгаш өске-даа чурумга профессионал хайгаарал херек. Кадык камгалалы биле спорт яамылары ол айтырыгны кады ажылдап кылырын даастым».
Республика Баштыңы Шолбан Кара-оол Тываның эрге-чагыргазы аныяктарның кадык мөзү-бүдүжүнге спорттуң ужур-утказын нептередип, деткиири чугулазын айыткан.