2018 чылда Тывага федералдыг субсидияларның хемчээли эрткен чылга деңнээрге 586 млн. рубль хөй

 Тываның Баштыңы Шолбан Кара-оол бо неделяда субсиядиялар бээр дугайында 10 дугуржулгага атты салгаш, республиканың чазаа чурттуң бюджединде бодунуң туружун камгалаарынга эки ажылдаанының үре-түңнели бо деп демдеглээн. Республика январь 31-ге чедир федералдыг яамылар болгаш ведомстволар-биле субсидияларга хамааржыр ам-даа 36 дугуржулганы чарар. Ооң-биле чергелештир, акшаландырыышкынның хемчээлиниң улгатканы акша-хөреңгини чөптүг ажыглаарынга регион эрге-чагыргазының харыысалгазын улам шыңгыырадырын чазак даргазы демдеглээн.

  «Камгалаары – ажылдың чүгле чартыы-дыр. Ол акшаларны боттуг херектерже: чурттаар оран-сава, уруглар садтары, школалар, спорт залдары, чаа оруктар тудуунче, чаа бүдүрүлгелер база бизнес ажыдарынче, шынарлыг ачы-дузаларже, харылзааның амгы инфраструктуразынче дээш, өске-даа чүүлдерже киирер. Бо чылда саң-хөөнү сайыттарның канчаар хуваап алганындан ол дыка хамааржыр. Ынчангаш ооң түңнелин күзүн санаар бис. Амдыызында дугуржулгаларның негелделин кичээнгейлиг көрүп, деңнештирип, ол акшалар-биле чүнү кылып алырын аайлап, сорулганы күүседирде хаара тудар курлавырларны, бүдүрүкчү күштерни тодарадыңар деп адырлар удуртукчуларынга сагындырып тур мен» - деп, база катап демдеглээн.