Тываның Баштыңы Шолбан Кара-оол ИХЯ-биле кады шиитпирлээр айтырыгларны демнежирин иштики херектер сайыды Александр Щурга сүмелээн

 Понедельникте аппарат хуралында, Тывада чаа томуйлаткан иштики херектер сайыды Александр Щурнуң киржилгези-биле республика девискээринде криминогенниг байдалды чугаалашкан. Чаа сайыт амгы бо хүннерде байдалды илеткеп, чоокку үеде Тываның барыын кожууннарынче үнер деп турарын дыңнаткан.

 «Тываның чаа иштики херектер сайыды А.А. Щур аппарат хуралынга киржип, бистиң ниити айтырыгларывысты сайгарып, кады ажылдап эгелээни дээш четтирдим – деп, Шолбан Кара-оол демдеглээн. – Александр Александрович РФ-тиң иштики херектер сайыдының оралакчызы А. Горовойнуң мурнунга көдүргенивис айтырыгларже - чажыт арага садыглаашкынынче база мал оорунче онза кичээнгейни угландырган. ИХЯ-биле кады шиитпирлээр айтырыгларывысты чазактың шупту кезектери, муниципалдыг тургузугларның удуртукчулары демнежип ажылдаарын негедим».