Тываның Баштыңы: Azimut Hotel Kyzyl хостуг үени чөптүг ажыглаарының чаа культуразын тургузар ужурлуг

 Баштайгы клиентилер ында келгени бо хонуктарда билдинген.  

«Чаа-ла ажыттынган «Азимут-Кызыл-Эне-Сай» отель республиканың баштайгы аалчыларын хүлээп эгелээн. Аалчылар бажыңының чижилгеде үлүү көскү черни ээлеп турар, ынчангаш ону өскелер билип алыр кылдыр ажылдарны чорудар – деп, Тываның Баштыңы Шолбан Кара-оол демдеглээн. – Аалчылар бажыңының топ-менеджерлери-биле чаа объектини бурунгаарладырын бөгүн чугаалаштывыс. Ылаңгыя бизнес-класстың туристерин хаара тударын дугуруштувус. Ынчап кээрге, бистиң бодувустуң болгаш Сибирьниң улуг аэропорттары-биле быжыг харылзааны тудар херек. Клиентилерни хаара тударының эң-не дээштиг арга-хевирлерин ажыглап, немелде сервистерни шиңгээдип, таарымчалыг өртек политиказын болгаш элээн шыңгыы маркетингини киирер бис. Шынарның бедик деңнелин тудуп, херек болза дыштанылганың чаа культуразын хевирлеп, аалчыларга ачы-дуза чедирер рынокта лидер болурун чедип алыр. Турисчи сезон ажыдыышкынынга ыяк белеткенир. Аалчылар бажыңынга президент класстың ийи номерин часка дээр киирер». 

Кызыл AZIMUT Отель бодунуң аалчыларынга Стандарт, Джуниор сьют база Президент сьют категорияларга дүүштүр кылган 108 таарымчалыг өрээлдерни сүмелеп турар. Көрүнчүктелип турар мозаика, маны база кылайтыр хоюглаан гранит даштар-биле каастаан администраторнуң аалчылар хүлээп алыр чери база улуг фойе – аалчылар бажыңының визит карточказы. Фойениң ханаларын «чиик» чуруктарлыг шагыглар-биле каастаан. Көрүнчүктелип турар дээвиириниң кыдыын алдын өң-биле кыдыглап, шил люстраларны асканы, аян-шинчини улам күштелдирген. Аалчылар бажыңының лифтилерин алдын угулзалар база көрүнчүктер-биле каастаан.  

Кызыл AZIMUT Отель хемчеглер эрттиреринге 3: 130 кижиге - улуг (ассамблея), 90 кижиге – ортумак (саммит), 34 кижиге – бичии (сессия) залды сүмелеп турар. Сөөлгү залды таарыштыр киир эптээн, шимчеп турар мониторларлыг база микрофоннарлыг, улуг шөйбек стол, эптиг креслолар база бир ханазында улуг монитор-биле дерээн. Аалчылар бажыңының ресторанын 120 олутка санаан.  

Кызыл AZIMUT Отельдиң аалчылары саунага, 240 дөрбелчин метр шөлдүг, улуг эштир бассейнге, түрк чунар-бажыңга дыштанып, массаж кылыр үш кабинеттиң ачы-дузазын ап болур. 

7 каът Кызыл AZIMUT Отелин Кызылдың төвүнде, Улуг-Хемниң эриинде туткан. Оон үнүп кээрге-ле, каш базым черде, Азия төвү культура комплекизи, Тыва Республиканың Чазак бажыңы, Тываның күрүне университеди, Национал музей, хоорайның кол шөлү.  

«Кызылда AZIMUT Hotels-тиң удуртулгазында бедик деңнелдиң аалчылар бажыңын тутканы, Россияның бот-тускайлаң онзагай регионунче даштыкы аалчыларны болгаш чурттуң иштинде солун черлерни сонуургап чоруур российжилерни хаара тударынга улуг салдарлыг болур» - деп, AZIMUT Hotels-тиң чиңгине директору Вальтер Нойманн чугаалаан.