Тываның Баштыңы аңныыр курлавырларын камгалаар болгаш ону калбартыр хемчеглерни алыр айтырыгны тургускан

Аңнар курлавырларын, оларның чурттап турар хүрээлелин камгалаар болгаш калбартыр талазы-биле хемчеглерни хандырып, аңнаашкынныг туризмни хөгжүдеринче инфраструктураны тургузарынга аңныыр ажыл-агыйларын киириштирер сорулгалыг аңнаашкын шөлдерин ажыглап турар кижилер-биле дугуржулга чарарының майыын Тываның Чазаа бадылаан.  

Республика Баштыңы Шолбан Кара-оолдуң даалгазы-биле, амгы үеде ведомство аңнаашкынныг туризмни хөгжүдер өзек точкалар кылдыр шенелде ажыл-агыйларны хевирлээринче кирген деп, Тываның аңныыр хайгааралының күрүне комитеди дыңнаткан. Комитеттиң удуртукчузу Геннадий Кууларның чугаазы-биле алырга, 2018 чылдың февральдан эгелеп, аңнаашкын туризминче инвестицияны кииреринге белен сайгарлыкчылар-биле ажыл-агыйжы чөпшээрежилгелерни чарар эргеге аукционнарны чарлаар.  

Тываның Баштыңы Шолбан Кара-оол декабрь 25-те Москвага, дагжы аңчыларның российжи клувунуң президентизи Эдуард Бендерский-биле чугаалашкан соонда, бодунуң даалгазын база катап сагындырган. «Эдуард Васильевичиниң аңныыр ажыл-агыйлары-биле ажылдаар арга-дуржулгазы улуг. Ооң-биле чугаалашкаш, аңнаашкынныг туризмни хөгжүдери чүгле коммерция эвес, а аңныыр черлерин камгалаарының дээштиг хевири, тайгага камныг ээни тывары, черлик амытаннарның санын көвүдедери, бойдусту камгалап арттырары-дыр дээрзинге база катап бүзүредим. Төтчеглекчи чорукка удур Тываның чурттакчыларынга аңнаашкын-балыктаашкын туризминиң ажык-чарлыг болгаш ажыктыг идеяларын шимчедирин чедип алыр бүрүн шиитпирлиг мен» - деп, республиканың баштыңы соцчеткилерде бодунуң арынында бижээн.  

Аңнаашкын туризмин хөгжүдер төлевилел Тываның аңныыр хайгааралының күрүне комитединиң чоокку үш чылда мурнады боттандырар ажылы дээрзин Геннадий Дамдын дыңнаткан.  

Республиканың эрге-чагыргазы инвесторларны деткииринге белен, ол сорулгага 10 млн. рубль акшаны регион бюджединде тускайлаан. Үш чыл иштинде республиканың тайгалыг кожууннары – Бии-Хемге база Каа-Хемге үш баазаны тудуп, ажыглап эгелээрин комитет планнаан. Аңныыр комплекизинде-ле аңчыларга бажыңнар, егерь кордоннары, доктаар пунктулар, хеме доктаар черлер, аң адар бедигээштер, аңга чем каап бээр дериглер, сери дээш, аңнаашкынны организастаарынга база туристерниң амыдыраарынга херек өске-даа тудуглар кирер.  

Егерьлерниң чугаазы-биле алырга, Тывада бо хүнде олча-тывыш аңнаашкыны бар. Аңныыр сезонунуң үезинде аңнаашкын организастаар профессионалдар 3-тен 5 млн. рубль орулганы киирип алыр. Ындыг болзажок республика черлик амытаннар адарынга чөпшээрел сатканындан аңгыда, барык чүнү-даа ажылдап албайн турар.  

Хоойлу езугаар олча-тывыштыг аңнаашкынга болгаш балыктаашкынга сонуургалдыглар-биле ажылдаар ажык-чарлыг туроператорлар тыптып; аңнаашкын-балыктаашкын туризминиң адырында ачы-дузаларның чажыт рыногун кызырып; төтчеглекчи чорук-биле демисежир, аңнаар черлерни камгалаар болгаш черлик дириг амытаннарның санын катап өстүрер сорулгалыг ажылчын олуттар чурттакчы чонга тургустунар деп, ТР-ниң Аңныыр хайгааралының күрүне комитеди санап турар.