ываның Баштыңы: Тывалар өскүс уругларны кажанда-даа кагбас чораан

 Тываның Баштыңы Шолбан Кара-оол Иелер хүнүнүң бүдүүзүнде ажы-төл азырап алган өг-бүлелер-биле ужурашкан.  

 «Шагдан бээр тыва кижи өскүс арткан уругларны боттарының төрээн уруглары ышкаш азырап, өстүрүп чораан.Үжен безин хар четпээн аныяктар өгбелерниң чараш чаңчылын уламчылап чоруурун көөрге чоргааранчыг-дыр. Оларның амыдыралчы мерген угаанын, кижизиин, боттарының кызымаа-биле келир үеге бүзүрелдиин көөрге, эки-дир. Кижи бүрүзүнге ынакшылы дээш аныяк иелерге четтиргеним илереттим» - деп, ол ужуражылга соонда бодунуң блогунга бижээн.

 Тывада бөгүнде 498 уруг азырап алган өг-бүлелер бар. Оларның төрээн адазын болгаш иезин солууру канчаар-даа аажок улуг күш-ажыл деп, Шолбан Кара-оол демдеглээн. Республикада 95 муң ажыг өг-бүлелерден чүгле 103 өг-бүле ындыг харыысалгалыг болгаш буянныг шиитпирни хүлээп алганы таварылга эвес. Көдээ черде чурттап чоруур өг-бүлелер ада-ие чылыы-биле чаштарны хүлээп алган. Бай-Тайга кожуунда 16 өг-бүле боттарының камгалалында ада-иези чок арткан 83 чашты ап, азырап алганнар.  

Шолбан Кара-оол ужуражылгада келген ада-иелерге байырны чедирип, дөрт өг-бүлеге курортка дыштаныр путевкаларны тывыскан. Уруглар азырап алган эң аныяк өг-бүле - Таңды кожуундан Севекпиттер 30 хар четпээннер, ындыг болзажок олар алды чаштарны өстүрүп-кижизидип чоруурлар. Республиканың Баштыңы оларга автомобиль садып алырынга дузалажырын аазаан. 

«Ада-ие хүлээлгезин төлептиг күүседир кылдыр уруглар азырап алган өг-бүлелерге күрүнеден деткимче көргүзериниң аргаларын тып, магадылаар ужурлуг бис. Оларның үлегери өскелерге чижек болур ужурлуг. Уруглар бажыңнарында өскүстерге таарымчалыг байдалдар бар-даа болза, өг-бүлениң чылыг одаа дээрге өг-бүле-дир, ону чүү-даа солуп шыдавас» - деп, Тываның Баштыңы демдеглээн.