Тываның үш улуг объектизи туризмни хөгжүдер федералдыг программаже кирер кордакчылар санында

Республикага турисчи инфраструктураны тургузары-биле холбашкан үш улуг төлевилелди боттандырарынче Тыва федералдыг кады акшаландырыышкынны чедип алыр сорулгалыг. Дагдан хаактаашкын комплекизи «Тайга», Чагытай хөлде турисчи бааза, сыын ажыл-агыйының этниктиг сууржугажының баазазында тудуп каан дузалал объектилери – оларның санында. Баш удур санаашкыннар-биле алырга, ол үш төлевилелдиң ниити түңү 3,5 млрд. рубль, Тываның эрге-чагыргазы ооң 70 хуузун хуу инвестициялар-биле катай, бюджеттен дашкаар дөстер акша-хөреңгизи-биле хандырар планныг. 

Республика туризм адырында ындыг төлевилелдерни боттандырарынга арга-дуржулгазы четчир. Эрткен 5 чылдың иштинде этниктиг сууржугаштан аңгыда, «Алдын-Булак» этнокультура комплекизин, чурттуң эмнээшкинниг эртинези – Дус-Хөлче баар орукту, Тываның найысылалының ылгавыр демдээ - «Азия төвү» архитектурлуг ансамбльди, аңгы-аңгы деңнелдиң 108 номерлиг дээди класстың отелин ажыглалда киирген. Ол аалчылар бажыңын хуу инвесторнуң акша-хөреңгизи-биле туткан. 

Республиканың Экономика яамызының медээзи-биле алырга, туризм адырын хөгжүдер программа күүселдезиниң үезинде, туризм адырында субъектилерниң саны 40 хуу, турисчи фирмалар – 15 хуу көвүдээн. Туристерниң саны ийи катап көвүдээн.  

Улуг хемчээлдиг чаартылгалар-биле чергелештир, Программаның дараазында чадазында, чаартынган аэропорт комплекизиниң делегей чергелиг секторун ажыдар, М-54 федералдыг автоорукту эде угландырыр, «Хандагайты» делегей чергелиг эрттирилге пунктузунуң эрттирер аргазын калбартыр чаа төлевилелдер Тываның турисчи ссорунзазын он-он катап улгаттырар.

 3-4 чыл иштинде туристерниң саны чылда-ла чартык миллион чеде бээрин специалистер санаан.