Тываның Баштыңының грантызын алгаш, Татьяна Брюханова башкы Хайыракан суурда чедип келген

 Татьяна Брюханова бо чайын республикага бир дугаар кээп, Дус-Хөлге дыштанып чорааш, Тываның агаар-бойдузунга ынакшып каан. Тыва Республиканың Өөредилге болгаш эртем яамызының сайтызындан ТР-ниң Баштыңы Шолбан Кара-оолдуң грантызының дугайында билип алгаш, аңаа киржир деп шиитпирлээн.  

 Бөгүн Татьяна Брюханова Хайыракан ортумак школазында төөгү болгаш ниитилел билиглерин башкылап турар.  

Ол ховар кижи: Красноярскиниң педагогика институдунга төөгү, ниитилел билии база эрге-хоойлу башкылаар мергежилди чедип алган. Москваның гуманитарлыг университединге практиктиг психолог мергежилди база шиңгээткен. Оон аңгыда Татьяна Брюханова социал психология мергежилинге аспирантура доозукчузу, а 2006 чылда персонал удуртуп-башкарар мергежилге профессионал эде белеткелди эрткен.  

Татьяна Брюханова Красноярск крайга төрүттүнгеш, өскен. Красноярск крайның Богучан ортумак школазынга төөгү болгаш ниитилел билиглерин башкылаан. Тозан чылдарда Москвага чурттап тургаш, аңаа аспирантура дооскан. С. Орджоникидзе аттыг күрүнениң эргелеп-башкарылга академиязынга база Красноярск хоорайда педагогика университединге башкылаан, ВУЗ соонда белеткелдиң психология факультедин сөөлгү чылдарда эргелекчилээн.  

Ындыг деңнелдиң специалистери бистиң республикавыска чугула херек курлавыр. Улуг-Хем кожууннуң өөредилге эргелели грант алыкчызы Татьяна Брюханованың калбак мергежилдиин өөренип көргеш, ооң арга-дуржулгазын болгаш билиг-мергежилин чөптүг ажыглаары-биле методист-психолог албан-дужаалга ажылдаарын сүмелээн. 

Чаа башкының бирги чергеде айтырыы – күрүнениң түңнел аттестациязынга доозукчу класстарны белеткээри болур. Гуманитарлыг мергежилдер чедип алырда ниитилел билиглери албан херек болганындан хөй санныг доозукчулар күрүнениң чаңгыс аай шылгалдазынга ниитилел билиглерин шилип ап турар. 

Ынчангаш Татьяна Брюхановага көдээ школада орус дыл хүрээлелин тургузуп ону сайзырадырынга база доозукчуларны түңнел шылгалдаларга шыңгыы белеткээринге улуг идегелди салган. Өөреникчилер, ада-иелер болгаш башкылар коллективи ону чылыг-чымчак уткуп алганын, кыска үе дургузунда Тываның кайгап ханмас бойдус-чурумалын чыып четтигипкенин Татьяна Брюханова чугаалаан. «Республиканың делгемнери магадап ханмас, кайгамчык-тыр».