Тываның Баштыңы республика чазааның чаа сайыттарын томуйлаан

 Тываның Баштыңы Шолбан Кара-оол ТР-ниң Чазааның яамылар звенозунда чаа кадрларны томуйлаанын чарлаан. 

 Таңды кожуун чагыргазын удуртуп турган Евгений Овсянников тудуг болгаш чуртталга-коммунал ажыл-агый сайыдында томуйлаткан. Кордакчыларны шилиирде кадрлар политиказын сагып, регионнуң Күрчөвүлелиниң чөпшээрелин алганын Шолбан Кара-оол тайылбырлаан. Муниципалитеттерниң элээн шылгараан удуртукчуларын республика деңнелинче депшидери – ооң бир арга-хевири.

  35 харлыг Евгений Овсянников – Шагаан-Арыг хоорай чурттуг. Юрист эртемниг, Тывада иштики херектер органнарында албандан ажылын эгелээн, оон суд приставтарының Улуг-Хем кожуунда килдизин удурткан. Шагаан-Арыг хоорай мэриниң амыдырал-хандырылга айтырыгларын харыылаар оралакчызы болуп үш чыл ажыг ажылдаан. Красноярск крайның Минусинск хоорай чагыргазынга ажылдаан арга-дуржулгалыг, мэрниң социал айтырыглар талазы-биле оралакчызы турган. 2017 чылдың марттан бо үеге чедир Таңды кожууннуң чагырга даргазының хүлээлгезин күүсеткен.

  Шолбан Кара-оол Тудуг яамызында байдалга анализти кылып, яамының структуразын, штадын, ол ышкаш кадрлар составын чаартпышаан, ажыл-чорудулганы экижидер санал-оналды киирер ажылчын бөлүктү тургузарын дааскан.

  Юстиция херектериниң талазы-биле сайыттың албан-дужаалындан Анна Абрамованы ооң дилээ-биле хостаанын республика Баштыңы дыңнаткан. Анна Ахмедовна албан-хүлээлгезинге ак сеткилдиг ажылдааш, ам хүндүлүг дыштанылгаже үнген деп, чазак даргазы демдеглээн. 

 Суд органнарында Тываның Баштыңының болгаш ТР-ниң Чазааның бүрүн эргелиг төлээзи турган 39 харлыг Аяс Оюнну сайыт албан-дужаалда томуйлаан.

 Аяс Оюн Кызылга төрүттүнген, юрист эртемниг. Прокуратура истекчизи албандан күш-ажылын эгелээн. РФ-тиң Юстиция яамызының территориалдыг эргелелинге хөй чылдарда ажылдаан. Юстиция херектериниң талазы-биле сайыт албан-дужаалга томуйладырынга чедир, 2012 чылдан бээр судтарда Тываның Баштыңының администрациязындан бүрүн эргелиг төлээ турган.