Россияның өөредилге болгаш эртем сайыды Ольга Васильева биле Президентиниң бүрүн эргелиг төлээзи Сергей Меняйло бөгүн Тывага ажыл-албан аайы-биле келир

 Кызылдың чаа «Спутник» микрорайонунда, Убсунур кудумчузунуң 10-гу адрезинде, 900 хире өөреникчиге чаа школа – 16 дугаар лицей бөгүн ажыттынар.  

 «Чаа школа найысылалдың ортумак ниити билиг өөредилге албан черлеринден эң-не дериттингени болур. 1971 чылда 15 дугаарлыг школа туттунган, сөөлзүредир ол хоорайның 15 дугаар лицеи болуп шылгараан. 46 чыл эрткенде, Кызылда чаа школа – 16 дугаарлыг лицей ажыттынып турары бо» – деп, Кызыл хоорайның баштыңы Дина Оюн чугаалаан.

 «Школаларга чаа санны кажан черле «парлаар» ирги бис деп, бодап турган мен. Ол ам боттанганы ол-дур!» - деп, улус өөредилгезиниң хүндүлүг ажылдакчызы, Тываның Хөй-ниити палатазының кежигүнү Альберт Безъязыков өөрүшкүзүн илереткен. 

 "Чаңгыс чер-чурттуглар, бо чылдың сентябрь 1-и онзагай хүн болур. Оолдар, уруглар "Спутникте" чаа школаның ажыдыышкынын четтикпейн манааннар. 825 олуттуг өөредилге албан чери чаа хөгжүп олурар микрорайоннуң быжыг кол инфраструктуразы болу бээр. Бөгүн РФ-тиң Президентизиниң Сибирьде бүрүн эргелиг төлээзинге видеоконференция харылзаазы дамчыштыр өөредилге черлериниң беленин илеткедим. Ынчангаш Сергей Иванович Меняйлону база катап Тываже чалаан кижи мен» - деп, Тываның Баштыңы Шолбан Кара-оол бодунуң блогунда бижээн. 

 15 дугаар лицейни ажыглалче киирген соонда, эрги школаларга - 1 дугаар школага, 5, 9 дугаар гимназияларга чаа оран-саваларны база 3 дугаар школаны туткан. Сөөлгү он чылдарда 15 дугаар лицейге (2008 чылда) база 8 дугаар школага (2011 чылда) ийи чаа эге школаларны тудуп, ажыглалче киирген.  

 Ам шуут чаа, амгы үении-биле дериттинген школа ажыглалда кирип турары бо!!!. Эрткен чылын ажыглалда кирген 280 олуттуг уруглар садының чанында объектиниң тудуун «Суугу» тудуг бүдүрүлгези кыска хуусаада тудуп дооскан.

  Чаа лицейни эр башкы – Альберт Борисович Дапылдай удуртур. Ол конкурс шилилгезин эрткеш, шылгарап үнген. 

 Бо лицейде шупту лицей класстар болурун Тываның Өөредилге яамызы дыңнаткан.