Террор-биле демиселде демнежилге хүнүнде Тывага класс шактары болгаш лекциялар эртер

 Сентябрь 3-те Россияга Террор-биле демиселде демнежилге хүнүн демдеглеп эрттирер. 2005 чылда федералдыг хоойлу-биле сактыышкынныг чаа хүннү доктааткан. Тываның Чазаа ниитилел-политиктиг, культурлуг, өөредиглиг хемчеглер планын бадылаан. 

 Сентябрь 3-те дайынчы болгаш албан хүлээлгезин эрттирип тургаш мөчээннерниң мемориалдарынга болгаш тураскаалдарынга боодал чечектер салыр езулалдар эртер. Ол-ла хүн, Тываның 5 чылы аттыг стадионга «Күш-ажылга болгаш камгалалга белен» күскү фестиваль болур.

  Сентябрьның бирги он хонуунда республиканың школаларынга, ортумак профессионал өөредилге черлеринге «Террор – чок!», «Террорда националдар чок» деп темаларга класс шактары болгаш лекциялар болур. Дээди болгаш ортумак өөредилге черлериниң бирги курсчулары-биле «Аныяктар террорга удур» деп ужуражылганы организастаар.  

Соңгу Осетияның Беслан хоорайга 2004 чылдың сентярьда болган коргунчуг болуушкуннар-биле сактыышкын хүнү дорт холбаалыг. Ынчан сентябрь 1-де, Билиглер хүнүнде, боевиктер 1 дугаар школаже шургуп киргеш, өөреникчилер, оларның да-иелерин болгаш башкыларны долаага тудуп алганнар. Терактыга 334 кижи когараан. 

Террор-биле демиселде демнежилгениң хүнү терроризм дээн ышкаш коргунчуг хай-бачыт-биле демиселге күрүне биле ниитилелдиң чаңгыс демин көргүзүп турар. Россия ол хүн Бесланга, Дубровкада театр шөлүнге, Буденновскга, Первомайскиге террористерниң холундан, Москва, Буйнакск база Волгодонскга чуртталга бажыңнарын чазылдырганындан, өске-даа террорисчи чүс-чүс актылар үезинде мөчээн муң-муң чер-чурттугларывыска сактыышкынны кылыр.