Тываның Баштыңы өөредилге болгаш эртем сайыды-биле ажылчын ужуражылганы эрттирген

  Бо өөредилге чылында 65160 кижи парталар артынга олуруптар. Сентябрь 1-де 7463 бирги классчылар школаның эргинин бир дугаар артап кирер. Тывада шупту 424 өөредилге организациялары: 176 школа, 203 уруглар сады, 13 ортумак профессионал өөредилге организациязы база немелде өөредилгениң 32 албан чери өөредилге чылынче киреринге белен.  

 Өөредилге албан черлериниң септелгезинче 110 млн. ажыг рубльди үндүрген, ооң 43 хире млн. рубли федералдыг бюджеттен, 32 млн-ин. республика бюджединден тускайлаан, а 35 млн. рубль акшаны муниципалитеттер киириштирген. Тываның 12 көдээ школазында спорт залдарның капиталдыг септелгези доозулган. 7 уруглар садында база немелде өөредилгениң 2 организациязында «Шаптараазын чок хүрээлел» программа-биле пандустарны кылып, логопед башкылар база психологтуг оожургал кабинеттерин дерээн.

 52 өөредилге албан чериниң котелдарын солуп, аварийлиг участоктарын септеп, чырыдылга херекселдерин санитарлыг нормага дүүштүр солаан. 424 организацияга агар септелгени чоруткан. Ниитизи-биле 18,8 млн. рубльди өрт айыыл чок чоруун, санитар-эпидемиологтуг болгаш террорга удур хемчеглерни хандырары-биле аңгылаан.

  Ээлчеглиг өөредилге чылының эгезинде Спутник микрорайонунда 825 олуттуг чаа школаны ажыдары найысылалда онза болуушкун болур. Оон аңгыда бо чылдың төнчүзүнге чедир Улуг-Хем кожууннуң Ийи-Тал суурда 176 олуттуг, спорт залдыг, малчыннар ажы-төлүнге интернаттыг школа тудуун ажыглалга киири планнаттынган.  

 Ужуражылга үезинде регион баштыңы биле ведомство удуртукчузу адырда чаа удуртулга технологияларын сайгарып, өөредилгениң шынарын экижидеринче башкылар ниитилежилгезин угландырары кол чүүл деп чугаалашкан. Ажылдың үре-түңнелдии, өөредилге чериниң ниити рейтингизин бедиткени чогуур күш-ажыл төлевирин хандырар ужурлуг. Тываның Баштыңы амыдыралдың берге байдалында уругларже онза кичээнгейни салырын сайыттан дилээн. Школаже ындыг ургаларны белеткээри-биле, сентябрь 1 бертинде, бүгү күштү ынаар мөөңнээр херек. Тываның Чазааның кежигүннери боттарының талазындан база деткимчени көргүзерин чугаалаан.  

 Республикада «Школаже чыгдынарынга дузалаш» ачы-буян акциязы уламчылап турарын сагындыраал. Өг-бүлеге болгаш уругларга деткимче төптеринде идик-хептерни, өөренир херекселдерни хүлээп ап турар.