Ш.Кара-оол: чогаадыкчы тура-соруун суларатпайн ажылдаар

 Шолбан Кара-оол чугааны эгелээр мурнунда, чоокта чаа чок болган Тимур Дулуштуң чырык адынга сактыышкынның минутазын оркестрниң артистери-биле кылган.

 «Өскүссүревезиңерни диледим. Өртемчейниң үүлези ындыг, дириг амытан өйү кээрге ол оранче чоруур. Ынчангаш кижи чоруй баарга ундарап, муңгарап, сула салдынган херээ чок деп бодаар мен. Удуртукчуңарның чырык адын төлептиг тудуп, оркестрниң ол үедеги деңнелин бадырып болбас. Дыка эки сактып тур мен, 2008 чылда оркестрни Кызылдың уран чүүл колледжизиниң студентилеринден үндезилип, ону сургуул оркестр деп турган бис. Ооң чогаадыкчы бурунгаар хөгжүлдезин улам сайзырадып, бедик деңнелче көдүрер дээш, Тываның Чазааның оркестри кылдыр эде тургузуп, статузун бедиткен бис. Республикада эртип турар фестивальдар, концерттер, конкурстар, ол ышкаш күрүне байырлалдары оркестрниң киржилгези-биле эртип, чоннуң, аалчыларның улуг үнелелин алганын билир силер. Ол бедик деңнелди бадырып черле болбас. Гастрольдарны эвээжетпезин, фестивальдарны хевээр арттырарын, Россияда чүгле чаңгыс санныг – аъттыг программаны чидирбезин культура яамызындан диледим. Харын-даа оларны улам сайзырадыр херек. Оркестр тургустунган соонда саткан хөгжүм херекселдери эргижирээн, дараан хептерниң үези келген боор. Аазаан автобузувусту дүрген шиитпирлеп эгелээр болза эки боор. Хөгжүм коллективи болганда, доктаамал шимчээшкинде турар болгай. Ам сүмележиксээн айтырыым – уран чүүл удуртукчузу кылдыр кымны хүлээп ап турарыңарны билип алыксадым. Бо айтырыгны соңгаарлатпайн, дарый шиитпирлээр херек. Ону коллектив боду сүмелезин» - деп, Тываның Баштыңы чугаалаан. 

 Тываның культура сайыды Алдар Тамдын коллективтиң дугайында каксы чугаалаан. «Чеже-даа берге хүннер турган болза, оркестрниң артистери Наадым дээн ышкаш республика хемчеглеринге идепкейлиг киришкен. Хөгжүмчүлерниң хөй кезии Тимур Дыртык-ооловичиниң бодунуң өөреникчилери дээрзин билир бис. Олар Чөөн-Сибирьниң культура академиязын дооскан. Саян Борбак-оолович Салчак дирижерлап, башкызын солуп турган. Ол кандидатураны коллектив сүмелеп турар. Башкызының ажыл-чорудулгазын уламчылап, бурунгаар бодап чораан планнарын боттандырарынга бүзүрелди берген. Сентябрь 1-де Барнаулга оюн көргүзүү баш бурунгаар планнатынган. Ону албан кылыр апаар. Келир чылын оркестрниң 10 чылдааны база бар» - деп, сайыт тайылбырлаан.

 «Тываның Чазааның оркестриниң удуртукчузу кижи бедик статуска дүүшкен турар. Кандыг-даа кижилер аразынга алдынып билир. Артыңарда улуг төөгүвүс, ада-өгбелеривис, чер-чуртувус, чонувус барын медереп, ады алгып сурагжаан оркестрниң адын төлептиг тудуп чоруурун утпаңар» - деп, Ш. Кара-оол чагааш, сула салдынмайн, башкызының ажылын уламчылаарын сүмелээн.