"Школаже чыгдынарынга дузалаш" ачы-буян акциязы бүгү Тывадан 1700 ажыг уругга дузаны көргүзер

 Хөй ажы-төлдүг, социал камгалалы кошкак өг-бүлелерден ажы-төлдү школаже үезинде белеткээр дээш ачы-буян акциязын чыл санында эрттирери чаңчыл апарган. 

 Өг-бүле болгаш уруглар херектериниң талазы-биле агентилелдиң дыңнатканы болза, июльдуң 25-тен август 15-ке чедир республикада ындыг өг-бүлелерниң мониторингизин эрттирген. Ооң түңнелдери-биле 1226 өг-бүлениң даңзызын тургускан, ында 1715 уруглар бар. 

 Кызылдың Өг-бүлеге болгаш уругларга социал деткимче төвүнде 33 уругга школачы идик-хептерни, канцеляр херекселдерин, рюкзактарны үлээнин дыңнаткан. Оон аңгыда 168 уруг өөренир херекселдерни, 120 уруг школачы идик-хепти, 21 уруг чүктээр сумкаларны алган. 

 ТР-ниң Өг-бүле болгаш уруглар херектериниң талазы-биле агентилел күүсекчи эрге-чагырга органнарынче дилег бижиктерни чоруткан. ТР-ниң Бойдус курлавырлары болгаш экология яамызы Кызылда чыылда пунктузунга канцеляр барааннарын чедирип берген. Оон аңгыда "Тывасвязьинформ" ПАН биле Кызыл хоорайның суд приставтарының албаны акцияга идепкейлиг киржип, дузаламчы акшаны чыгганнар. 

 Хуу сайгарлыкчылар болгаш энерел сеткилдиг кижилер хажыызында артпаан. Тес-Хем кожуунда "Лилия" садыының ээзи 15900 рубль акша түңүнге юбкалар, жилеттер, чүвүрлерны саткаш, хереглелдиг уругларга дамчыдып бээр кылдыр кожууннуң өг-бүлеге болгаш уругларга дуза көргүзер төвүнге хүлээткен. Эрзин кожуунда хуу сайгарлыкчылар Лакпажап, Боодей, Чооду, Кочаа канцеляр барааннарын (кыдырааштар, альбомнар, өңнүг карандаштар, номнар картыларын) белек кылдыр демчыткан. Кызыл хоорайның чурттакчызы Р.Г. Топоева ручкалар, кыдыраштар, карандаштар дээш, өске-даа чугула херек чүүлдерни социал деткимче төвүнге хүлээткен.

 ТР-ниң Күш-ажыл болгаш социал политика яамызы, Өг-бүле болгаш уруглар херектериниң талазы-биле агентилел энерел сеткилдиг чонну база албан черлерин, организацияларны ачы-буян акциязынга киржир кылдыр чалап тур. Хеп аймаа, идиктер, чүктээр сумкалар, канцеляр барааннары дээш, кандыг-даа дузаны өг-бүлелер алырынга белен.  

Кызыл хоорайда чыылда пунктулары дараазында адрестерде: Бай-Хаакская кудумчузунда 6 дугаар бажың база Кочетов кудумчузунда 29 дугаар бажыңда, 114 кабинет (ТР-ниң Херээженнер эвилели). Кожууннарда өг-бүлеге болгаш уругларга социал деткимче төптери ачы-буян дузазын хүлээп ап турар.