Бойдус халавындан когараан Россияның тос регионунуң көдээ ажыл-агый бүдүрүкчүлери компенсацияны алыр

 — Дараазында чугула айтырыг – онза байдалдардан когараан көдээ бүдүрүкчүлерге компенсация кылдыр акша-хөреңгини тускайлаары. Бо чылын суг үелери, каңдаашкын, долу дээш, бойдустуң өске-даа халавындан көдээ ажыл-агыйлар когараан. Бюджетте ол сорулгага акшаны көрүп каан. Тос регион 1,3 млрд. рубльди алыры планнаттынган. Эң когараан черлер-дир – деп, Д.Медведев чазак хуралында чугаалаан.  

 Россияның Көдээ ажыл-агый яамызы айтыышкынның төлевилелин белеткээн. Ведомство Башкортостан база Тыва республикаларга, Волгоград, Вологда база Тула областарга, Приморье база Хабаровск крайларга, база ол ышкаш Карачаев-Черкесск база Чечен республикаларга федералдыг бюджеттен акша-хөреңгини аңгылаарын дилээн.

  — Онза байдалдың уржуундан ниитизи-биле 140 муң га шөлде көдээ ажыл-агый культуралары узуткаттынган – деп, Россияның көдээ ажыл-агый сайыды Александр Ткачев дыңнаткан. 

 Тывага 23 млн. 583 муң рубль көрдүнгенин республиканың көдээ ажыл-агый болгаш аъш-чем яамызы тайылбырлаан.