18.08.2017
Тываның Чазаанга республиканың террорга удур комиссиязының калбак хуралын муниципалитеттер-биле видео-конференция харылзаазынга эрттирген.
2013-2018 чылдарда Россияда террор идеологиязынга удур хөделиишкинниң комплекстиг планының негелдези езугаар, террорга удур профилактика адырында программаларны ажылдап кылыр болгаш боттандырар, тайылбырлыг медээ-суртаал хемчеглерин организастап эрттирер хүлээлгени муниципалитеттерде онааган. Хуралдың киржикчилери 2017 чылдың бирги чартыында муниципалдыг тургузугларда террорга удур комиссияларның комплекстиг планының күүселдезин сайгарып чугаалашкан.
Улуг-Хем, Чөөн-Хемчик, Сүт-Хөл база Өвүр кожууннарның болгаш Ак-Довурак хоорайның удуртукчулары байдалдың дугайында видеоконференция харылзаазы-биле илеткээн. Муниципалитеттер комплекстиг планның хемчеглериниң шынарын болгаш үре-түңнелин бедидип, чогуур хыналданы хандырар ужурлуг.
Оон аңгыда, Тывада онза айыылдыг объектилерниң база амыдырал-хандырылга объектилериниң террорга удур камгалал байдалын база чугаалашкан. "Межегейуголь" хөмүр-даш компаниязы» КХН, "Водоканал" КХН, "ТЭК 4 БК" ТР-ниң КУБ база "Енисей" МУБ удуртукчуларының илеткелин дыңнаан.
Республиканың онза айыылдыг объектилер болгаш амыдырал хандырылга объектилериниң реестринче 30 бичии-ле ажыг албан черлери болгаш оран-савалар кирип турар.
Айыыл чок чоруктуң албан сагыыр негелделериниң күүселдезин аңгы план езугаар хынап, бирги чартык чылда коммунал объектилерге 6 хыналданы чоруткан.
Келген кижилер бүрүткээр дептерниң база айыыл чок чорук техниказының талазы-биле тайылбыр журналының чогу, таңныыл ажылдакчыларының ажыл хүлээлгелерин чедир билбези, камгалалдың инженер-техниктиг дериг-херекселдери-биле чедир дериттинмээни – четпес ажылдың бадыткалы.
Айыыл чок чорук хандырылгазының негелдезин хажытканы дээш албан-хаакчы кижи административтиг харыысалгага онаажыр. Регионда террорга удур ажыл-чорудулганы чогумчудары-биле комиссияның составынче өскерилгени киирген. Тываның Баштыңы – террорга удур комиссияның даргазы Шолбан Кара-оолдуң шиитпири-биле, РФ-тиң Айыыл чок чоруктуң федералдыг албанының Тыва Республикада кызыгаар эргелелиниң начальниги Вячеслав Шкирьни комиссия составынче киирген.