Тыва: Россияның почтазы «Азия төвүнде хөөмей» фестивальга тураскаадып эң ховар почта таңмазын белеткээн

 Тыва Республикада ФПАЭ – «Россияның почтазы» ФКУБ-ниң салбыры, ТР-ниң Информатизация болгаш харылзаа яамызы болгаш коллекционерлер таңма базар езулалга киришкен. Почта продукциязын чыып турарларга тыва филателияның эң сөөлгүзү - ховар тывыш болур. Тускай темалыг таңма баскан почта карточкалары болгаш маркалар ону эки билир кижилериң чыылдазынга төлептиг черни ээлеп, улуг өртек-үнени тургузар.  

 Таңма базар хүндүлүг аалчы кылдыр алдарлыг хөөмейжи Ай-Хаан Ооржакты чалаан. «Азия төвүнде хөөмей» делегейниң II хөгжүм фестивалының сүлде демдээн сиилбээн тускай таңманың бирги изин арттырар хүндүлүг хүлээлгени аңаа берген. Ооң соонда «Россияның почтазы» тыва салбырның директорунуң оралакчызы Вероника Куулар почта карточказын бодунуң чоок кижилеринче чорударын Ай-Хаанга сүмелээн.  

 Хөйге-чарга билдингир хөөмейжи мындыг хемчегде бир дугаар киржип турарын чугаалаан:

  – «Азия төвүнде хөөмей» фестивальга тураскаадып кылган таңманың ачызында, бистиң чуртувуста, база бүгү делегейде чоруткан тускай базындылыг почта чорудуглары-биле хөөмейни ам-даа нептередип болур бис. Тыва Республиканың хүнү-биле байыр чедирген бижикти бодумнуң төрээннеримче чорудуптум. 

 Посткроссинг деп адаар чорудугну өске аалчылар база ажыглаан: таңма базар үеде тургузуп каан почта хааржактарын ажыглап, делегейниң кайы-даа булуңунче открыткалары күзелдиг кижи бүрүзү чоруткан. Посткроссингини Тывада ийи дугаар эрттирип турарын сагындыраал. Тускай таңмалыг открыткалар кыска хуусаа иштинде адрестеринге чеде бээрин Вероника Монгун-ооловна тайылбырлаан.